Ministériu Justisa sensibiliza Lei Tráfiku Umanu iha Bobonaro
MALIANA, 29 marsu 2023 (TATOLI) – Ministériu Justisa no Komisaun Luta Kontra tráfiku Umanu, sensibiliza lei tráfiku umanu, númeru 3/2017 ba autoridade lokál sira iha postu administrativu Maliana, munisípiu Bobonaro.
Ministru Jutisa, Tiago Sarmento Amarál, esplika, lei ne’e Parlamentu Nasionál aprova ona dezde 2017 ho nia dekretu lei ne’ebé hahú hosi 2021 no konsege kria ona komisaun ba luta kontra tráfiku umanu ne’ebé hahú hala’o ona nia kna’ar.
Nia subliña, hahu iha tinan kotuk komisaun ne’e mós elabora informasaun no análiza hodi halo atuasaun no prevensaun ba asuntu refere, tanba dadus hatudu hosi tinan 2016 to’o 2022 Timor-Leste rejista kazu tráfiku umanu hamutuk 731 ne’ebé daudaun ne’e prosesu ona iha tribunál no balu sei iha inkéritu nia laran.
Ministru Tiago hatutan, presiza halo atividade refere atubele fahe informasaun ba autoridade loká sira nune’e krime hirak-ne’e labele hada’et no akontese beibeik iha Timor-Leste.
Notísia relevante: Governu altera Dekretu-Lei komisaun kontra tráfiku umanu
“Entaun presiza sosializa informasaun ba komunidade hotu-hotu, liuliu líder komunitáriu sira, líder munisípiu, prezidente autoridade ba to’o iha nível suku, aldeia, depois sira hatene hodi kontribui no koordena, koopera hamutuk hodi luta kontra tráfiku umanu,” nia inform ba Jornalista sira, iha edifísiu STAE munisípiu Bobonaro, tersa ne’e.
Tuir nia, luta kontra krime organizadu ne’e la’ós komisaun mesak de’it, maibé presiza kolaborasaun no kooperasaun di’ak hosi autoridade hotu tanba oras ne’e daudaun estadu preokupa tebes ho kazu krime refere.
“Krime tráfiku umanu ne’e la’ós kona joven de’it, maibé hosi ema-boot ba to’o ema kiik, feto, mane ho ferik-katuas no labarik, tanba krime ne’e nia tarjetu la’ós joven de’it, entaun estadu iha devér atu proteje, asegura katak sira-nia sidadaun labele hetan informasaun ne’ebé tán de’it sira-nia ignoránsia ema aproveita uza sira atu hamosu krime ida to’o komete krime táfiku umanu,” nia fundamenta.
Sekretáriu Autoridade Munisípiu Bobonaro, João de Fátima do Carmo, agradese ba Ministériu Justisa, tanba bele sensibiliza lei refere, tanba munisípiu Bobonaro hela kedas iha liña fronteira terrestre baliza ho nasaun viziñu Indonézia nune’e kazu tráfiku umanu fasil atu akontese.
“Ita haree katak ita-nia komunidade sira barak mak sai vítima ba tráfiku umanu, entaun ho lei ida-ne’e bele enkoraja autoridade sira, lideransa komunitária sira, aldeia sira no entidade hotu-hotu atubele iha koñesimentu, liuliu iha prevensaun no kombate tráfiku umanu,” nia katak.
Enkuantu Komisaun Kontra Tráfiku Umanu ne’ebé komposta hosi komisariu sira mai hosi Ministériu Públiku (MP), Polísia Sientífika Investigasaun Kriminál (PCIC, sigla portugés), Polísia Investigasaun, Migrasaun no organizasaun sosiedade sivíl Asisténtia Legál ba Feto no Labarik (ALFELA), Programa Monitorizasaun Sistema Judisiál (JSMP) no instituisaun sira seluk ne’ebé hetan delegasaun kompetensia ba investigasaun kriminál.
Notísia relevante: ALFela sensibiliza lei tráfíku umanu ba profesór sira iha Covalima
Jornalista : Sérgio da Cruz
Editór : Evaristo Soares Martins
