DILI, 03 abríl 2023 (TATOLI)—Governu Timor-Leste no Portugál liuhosi Ministériu Solidariedade Sosiál no Inkluzaun (MSSI) no Ministériu Traballu, Solidariedade no Seguransa Sosiál (MTSSS) hala’o lansamentu ba futuru instalasaun sentru atendimentu integradu ba ema ho defisénsia inklui labarik sira iha Aianro.
Vise-Primeiru Ministru no Ministra Solidariedade Sosiál no Inkluzaun (MSSI), Armanda Berta dos Santos, hateten objetivu harii sentru ne’e atu halo atendimentu integradu ba komunidade sira-ne’ebé iha situasaun frajilidade, liu-liu ema ho defisiênsia, labarik no feto sira-ne’ebé hasoru violénsia doméstika no violénsia bazeia ba jéneru, labarik no jovens ne’ebé moris iha situasaun vulnerabilidade nia laran.
“Kooperasaun entre Governu Timor-Leste ho Portugál importante tebes atu promove feto, labarik no ema defisiénsia ne’e mak ohin hamutuk iha fatin ida-ne’e ho objetivu lansamentu ba futuru instalasaun sentru atendimentu integradu no lansamentu ida-ne’e fó oportunidade no atendimentu ho infraestrutura modernu, kualidade ho ekipamentu kompleitu nomós iha jestaun ne’ebé mak di’ak no persiza rekursu umanus ne’ebé kualifikadu,” Governante Vise-Primeiru Ministru no Ministra Solidariedade Sosiál no Inkluzaun (MSSI) ne’e hateten liuhosi nota imprensa ne’ebé Agência Tatoli asesu, segunda ne’e.
Tuir nia, Portugál prontu simu ka fornese formasaun no formasaun espesiál iha ne’ebá no depois sentru ne’e nia prosesu kontrusaun ramata.
“Ha’u hato’o ha’u-nia agradese barak ba Governu Portugál tanba fó sira-nia apoiu mak ohin ita bele realiza eventu ida-ne’e no lahaluha mós agradese ba komunidade no Ministériu Justisa tanba atribui ona rai ektare haat (4) mai MSSI hodi bele estabelese sentru,” nia dehan.
Ba fatin ne’e, nia dehan tinan ida-ne’e sei halo estudu viabilidade no ba tinan oin tau orsamentu hodi bele halo ona.
Embaixadora Portugál iha Timor-Leste, Maria Manuela Freitas, hateten agradese tebes ba komunidade Ainaro ne’ebé ho vontade di’ak hodi oferese fatin ida-ne’e bele hari’i sentru ida atu tau matan ba maluk sira-ne’ebé mak kbiit laek.
“Apresia tebes ba Governu Timor-Leste ne’ebé mak nafatin hakarak hatudu vontade no luta hodi redus ema kbi’it laek ninia nesesidade,” nia dehan.
Administradór munisípiu Ainaro, Leovogildo Amaral Pereira, urgullu tanba Embaixadora Portugál bele servisu hamutuk ho Governu Timor-Leste hodi hari’i sentru atendimentu integradu ida-ne’e.
“Ha’u hanesan Administradór Munisípiu Ainaro orgullu tebes-tebes programa ida-ne’e ba futuru bele akumula ita-nia ema sira-ne’e hanesan defisiénsia no kbiit laek nomós agradese ba Suku Ainaro nia tanba bele oferese rai ida-ne’ebe luan tebe-tebes atu hari’i sentru ida-ne’e. Sentru ida-ne’e di’ak tebes ba munisipiu Ainaro inklui mós munisípiu seluk karik sira-nia ema ruma mai atu hela iha sentru ne’e ho kontente tebe-tebes,” nia dehan.
Jornalista : Osória Marques
Editór : Cancio Ximenes
