BALIBO, 12 Abríl 2023 (TATOLI) – Hafoin udan para dezde loron 11 fulan-abríl ne’e, movimentasaun transporte públiku tantu karreta no motorizada iha estrada suku Leo-Lima, postu administrativu Balibó, munisípiu Bobonaro, hahú normál hikas tanba ekipamentu pezadu hosi kompañia Montana Diak ra’ut sai hotu tahu nurak ne’ebé taka metin estrada nasionál Dili ba Maliana.
Operadór mákina kompañia Montana Diak, Augusto Juaquim Soares, esplika, empreza simu orientasaun hosi Ministru Obra Públika, Abel Pires, katak halo normalizasaun, sei fakar rai-mutin, taka ho rai-henek nune’e tempu udan estrada labele kois no tahu-dodok.
Notísia relevante: IGEADI-Montana Diak normaliza estrada Leo-Lima
“Ami normaliza hotu, sei ateru fali rai-mutin ho rai-henek iha leten halo kabeer, ida-ne’e udan mai mós nia sei la tahu tán, rai monu mós sei la taka tomak estrada, tanba foho-lolon sira-ne’e ami halo eskada, karik udan, rai monu tun, nia kait iha eskada sira-ne’e la tún mai liu,” nia informa ba jornalista sira, iha Leo-Lima, Balibo, kuarta ne’e.
Nia haktuir, durante fulan ida-resin ona halo normalizasaun hasoru difikulta oinoin tanba hafoin ateru rai-tetuk, udan udan tún rai iha foho-lolon mós kontinua monu fali hodi taka-metin estrada to’o hamosu engrafamentu kuaze bele to’o loron tomak.
Maibé operadór ne’e garante ekipamentu pezadu hamutuk haat komposta hosi eskavatór tolu, lowder ida inklui karreta fuzu ida kontinua halo serbisu iha terrenu hodi fasilita movimentasaun públiku.
“Ami simu orientasaun hosi Ministériu Obra Públika ateru hotu, estrada di’ak loos mak foin fila,” nia salienta.
Komunidade suku aldeia Ai-Asa, suku Leo-Hitu, postu administrativu Balibó, Inacio Vicente, sente kontente tanba kompañia ateru ona estrada halo kabeer hodi fasilita sira viajen ba-mai hosi suku ba postu no kapitál Maliana.
Maibé nafatin husu ba Ministériu Obra Públika atu kontinua tau-matan ba kondisaun estrada iha área refrte nune’e tempu udan povu labele preokupa beibeik tanba estrada hanesan dalan alternativa.
“Ha’u sente katak, estrada liu ba liu-mai ne’e ba ami komunidade sai hosi ami-nia suku, postu atu ba iha munisípiu, ne’e ami sente difisil tebes, atu lori ami-nia produtu lokál sira ba fa’an iha merkadu munisípiu araska, mai to’o iha-ne’e ami tenke hasai osan, hodi selu ema lalin ami-nia sasán sira-ne’e mai foun liu ba mai,” nia akresenta.
Tuir observasaun Agência Tatoli iha terrenu nota katak, atu asesu ba mai motorizada no karreta tenke hein menutu ida ka rua mak ekipa sira autoriza liu, tanba sei ateru halo rai halo kabeer.
Notísia relevante: Governu presiza prioritiza estrada ligasaun Balibo-Batugade
Jornálista : Sérgio da Cruz
Editór : Evaristo Soares Martins
