DILI, 17 abríl 2023 (TATOLI)—Sekretaria Estadu Formasaun Profisionál no Empregu liuhosi Diresaun Nasionál Empregu Exteriór (DNEE) hamutuk ho Korean Student Language Programme (KSLP) iha Timor-Leste, realiza formasaun preliminár ba kandidatu traballadór Koreia Súl hamutuk 236.
Diretór Diresaun Nasionál Empregu Exteriór, Filomeno Soares, hateten atividade ne’e ho objetivu atu hanorin kandidatu traballadór sira kona-ba kultura, disiplina no ambiente serbisu iha Koreia Súl nune’e sira bele hatene ambiente molok tama bá serbisu.
“Atividade ne’e atu fó hatene kondisaun, situasaun, no tradisaun iha Koreia Súl molok sira aranka ba serbisu iha Koreia Súl,” Filomeno Soares, hateten iha salaun igreja Sagrado Coração de Jesus, Becora, segunda ne’e.
Notísia relevante: Governu despede traballadór timor-oan 100 bá serbisu iha Koreia Súl
Iha biban ne’e, Diretór ne’e apela ba kandidatu traballadór sira ne’ebé hetan ona oportunidade hodi hadok-an hosi ransu livre no kuidadu saúde tanba atu bá serbisu iha Koreia Súl mak deteta moras no halo krime mak sei halo kansela.
“Ha’u husu imi aproveita didi’ak atividade formasaun preliminár ne’e durante loron lima atu imi bele hatene didi’ak regulamentu sira tanba sesaun ida-ne’e sei lori ita boot sira hatene kultura no ambiente serbisu iha Koreia Súl,” nia fó hanoin.
Jornalista : Arminda Fonseca
Editora : Julia Chatarina
