DILI, 17 abríl 2023 (TATOLI)—Providór Direitu Umanu no Justisa (PDHJ), Virgílio da Silva Guterres, hateten PDHJ lamenta ho desizaun órgaun eleitorál ne’ebé limita jornalista mídia privadu sira atu ezesrse sira-nia direitu votu iha eleisaun parlamentár 2023.
“Provedória lamenta ho jornalista sira balun ne’ebé labele ezerse sira-nia direitu votu iha eleisaun parlamentár nian maibé ida-ne’e ha’u hanesan provedór hanesan diskriminasaun boot ida hosi entidade reguladora eleisaun nian,” nia dehan ba jornalista sira, hafoin partisipa diskusaun públiku kona-ba “Direitu Prizioneiru hodi asesu ba justisa formál” iha salaun JL Vila, segunda ne’e.
Tuir PDHJ, fornesimentu informasaun ne’e sei menus tanba jornalista barak mak sei fila ba nia moris fatin hodi vota.
“Ida-ne’e bele dehan implika no viola direitu umanu tanba jornalista sira buka informasaun para hakonu direitu públiku nian atu hetan informasaun,” nia dehan.
Diretór Jerál Sekretariadu Tékniku Eleitoral (STAE), Acilino Manuel Branco , hateten mídia estatál TATOLI, I.P no Rádiu Televizaun Timor-Leste, Empreza Públiku (RTTL, E.P) bele vota iha fatin ne’ebé sira halo kobertura bá.
“Jornalista TATOLI, I.P ho RTTL, E.P mak bele vota iha fatin ne’ebé mak ita-boot sira halo knaar bá ka halo kobertura bá. Maibé jornalista mídia privada seluk sei labele no tenke ba vota tuir nia kartaun eleitorál rejistu bá,” Diretór Jerál ne’e dehan.
Tuir nia, STAE halo tuir de’it bazeia ba alterasaun lei eleitorál ba Parlamentu Nasionál.
Nia esplika, ba jornalista sira-ne’ebé la vota iha fatin kobertura ne’e, STAE liuhosi Ministériu Administrasaun Estatál (MAE) propoin pontu balun hodi ajuda kria fatin paralelu sira, nune’e sira bele vota.
“Maibé ida-ne’e ita hein de’it ona tanba seidauk hetan promulgasaun hosi Xefe Estadu. Tanba ita halo ida-ne’e hodi fó tratamentu justu ba jornalista sira hotu. Tanba STAE bainhira halo nia servisu ne’ebé operasionliza ne’e tenke ho baze legál. Tanba bainhira laiha mínimu dekretu-lei ida mak STAE labele halo buat ida. Ho ida-ne’e , ha’u apela hela de’it ba Na’in-ulun sira atu konsidera alterasaun lei eleitorál ne’e importante no ida-ne’e mós lori aumenta taxa partisipasaun iha eleisaun ne’e,” nia dehan.
Notísia Relevante: Jornalista TATOLI, I.P-RTTL, E.P bele vota iha fatin kobertura
Jornalista : Osória Marques
Editór : Cancio Ximenes
