Aimoruk hapara fuma liu ona prazu maibé sei uza nafatin iha Formoza
DILI, 24 abril 2023 (TATOLI) – Responsável iha Sentru Hapara Fuma Formoza, Médiku Jerál, Eldino de Castro Rangel, informa aimoruk hapara fuma, daudaun ne’e, liu ona prazu, maibé sei uza nafatin hodi fó atendimentu ba fumadór sira ne’ebé hakarak hapara fuma.
“Aimoruk hapara fuma nian, ida taka ba isin (Patch 4mg no 21mg), daudaun ne’e, espire ona iha fulan marsu maibé ami uza nafatin hodi fó atendimentu ba pasiente sira ne’ebé mak hakarak hapara fuma”, Eldino de Castro Rangel dehan ba TATOLI iha nia kna’ar fatin Formoza, ohin.
Nia dehan, dezde janeiru, profisionál saúde sira uza aimoruk sumingal ka nata de’it (Nicotine Gum 2mg no 4mg) hodi fó atedimentu ba pasiente sira ne’ebé hakarak hapara fuma.
“Husi janeiru to’o agora, ami uza aimoruk oin ida de’it mak fó atendimentu ba pasiente maibé ho alternativu ne’e mak ami iha laiha rezultadu ne’ebé di’ak’’, nia afirma.
Nia esplika, maske hein aimoruk foun mak profisionál saúde sira nafatin uza aimoruk ida ne’ebé espire hodi fó atendimentu ba ema sira ne’ebé hakarak hapara fuma.
“Ita hein aimoruk foun maibé seidauk mai, ita buka alternativu ida ne’e hodi atende sira maske aimoruk espire maibé la iha efeitu negativu ba sira nia saúde”, nia deklara.
Aimoruk sira ne’ebé mak la iha, responsável ne’e halo ona pedidu ba Ministériu Saúde atu tempu badak bele iha ona, atu garante tratamentu ba fumadór sira.
Dezde janeiru, pasiente ne’ebé hetan tratamentu iha Sentru Hapara Fuma hamutuk 325, husi númeru ne’e pasiente tuan hamutuk 131 no foun 194.
“Pasiente ne’ebé mak mai halo tratamentu hodi hapara fuma, husi idade 20 to’o 40, maioria husi joven sira”, nia konklui.
Jornalista : Felicidade Ximenes
Editór : Zezito Silva
