ERMERA, 24 abríl 2023 (TATOLI) – Sekretariadu Tékniku Administrasaun Eleitorál (STAE) realiza atividade edukasaun votante iha Suku Ponilala, Postu administrativu Ermera, Munisípiu Ermera atu eduka komunidade sira iha área rurál hodi vota ho loloos iha Eleisaun Parlamentár, 21 fulan maiu, tinan ne’e.
Brigada STAE Suku Ponilala, Dulcio dos Santos haktuir katak objetivu husi edukasaun votante ne’e atu eduka komunidade sira iha área rurál partikularmente suku Ponilala, hodi vota ho loloos iha eleisaun parlamentár.
“Iha eleitór barak mak seidauk kompriende atu vota ho loloos. Entaun iha brigada na’in haat ohin hala’o Edukasaun votante iha aldeia Kota-Heu hodi fahe informasaun ba eleitór sira oinsá atu vota iha eleisaun parlamentár tuirmai ne’e ho loloos,” Dulcio ba Tatoli, iha Aledeia Kota-Heu, Suku Ponilala, Munisípiu Ermera, segunda ne’e.
Nia haktuir, bazeia ba esperiénsia eleisaun prezidénsia iha tinan kotuk, eleitór barak mak seidauk vota ho loloos.
“Entaun, edukasaun votante ne’e, sei ajuda ita-nia eleitór sira atu ezerse sira-nia direitu demokrátiku ho loloos,” Dulcio salienta.
Komunidade besik 50 mak partisipa iha edukasaun votante refere ne’ebé mak loke husi Xefe Suku Ponilala Amaro Silverio.
Edukasaun votante ne’e hala’o uluk iha aldeia Kota-Heu, no sei alarga ba aldeia haat seluk mak hanesan Eroho, Nunupu, Hatuposi no Sacoco, no ba mos Eskola Sekundaria Paralelu NKS Ponilala.
Iha parte seluk, Xefe Suku Amaro akresenta katak edukasaun votante importante atu ajuda inan-aman, ferik no katuas sira atu labele vota sala iha eleisaun parlamentár.
“Edukasaun votante ne’e atu ajuda ita ba vota ho loloos no labele vota sala hanesan iha eleisaun hirak liu ba. Inan-aman sira dalaruma vota sala ou la tuu iha buletin votu nia laran ka tuu fali iha liur. Ou, dala ruma sira tuu rua, tolu dala ida, entaun votu sira ne’e sei la konta. Tanba ne’e mak brigade STAE sira mai hala’o edukasaun votante ne’ebé mak sei kobre aldeia lima ne’e hodi hanorin eleitór sira atu vota ho lolos,” Amaro hateten.
Iha fatin hanesan, Líder komunitáriu ne’e husu mós ba komunidade sira atu labele kria konflitu iha suku Ponilala tan de’it kór partidu ketak-ketak.
“Bandeira husi partidu oioin ne’ebé mak hasa’e iha Ponilala ne’e durasaun fulan ida de’it. Kuandu eleisaun hotu ona, bandeira sira ne’e sei la hasa’e tan ona. Entaun tau ita-nia kultura Fetosá Umane mak iha oin tanba maske ita partidu ketak-ketak maibé ita hotu sei iha relasaun famíla,” Xefe Suku apela.
Jornalista: Filomeno Martins
Editora: Nelia Borges
