HIM–SSK fó formasaun “Integradu Akonsellamentu Fó han Ba Bebé no labarik”
ERMERA 25 abril 2023 (TATOLI) – Organizasaun Naun-Governamentál (ONG) Haburas Ita Moris (HIM) hamutuk ho Sentru Saúde Komunitária Guisarudu, Postu administrativu Hatulia B, Munisípiu Ermera fó formasaun “Integradu Akonsellamentu Fó han Ba Bebé no Labarik” hodi hasa’e inan sira-nia koñesimentu kona-ba fó han saúdavel no susu-been inan nian ba bebé no labarik sira.
Membru husi Grupu Suporta Inan (GSI) hamutuk na’in 15 mak tuir formasaun refere iha Suku Lisapat, Postu Administrativu Hatulia B, Munisípiu Ermera.
Xefe husi ONG HIM, Zedevan Fatima Exposto haktuir katak objetivu husi atividade ne’e atu fó formasaun ba Grupu Suport Inan (GSI) sira liu-liu atu halo akonsellamentu ba inan isinrua no inan ho labarik ki’ik ne’ebé mak durante ne’e la asesu ba fasilidade saúde. Entaun membru GSI sira-nia prezensa iha formasaun ida ne’e atu tulun inan sira iha komunidade hodi hakbesik aan ba fasilidade saúde,” Zedevan informa ba Tatoli, iha Suku Lisapat, tersa ne’e.
Nia dehan, tuir alvu, formasaun refere sei implementa iha suku 52 iha munisípiu Ermera laran tomak. “Formasaun ne’e ita hala’o ona iha suku 35, sei hela suku 17 mak sedauk.”
Reprezentatne Xefe Sentru Saúde Guisarudu, Maria Magdalena Leto Mali husu ba membru GSI 15 atu aproveita formasaun refere ho didi’ak atu aprende buat di’ak ruma hodi hadi’a saúde inan sira nian.
“Nu’udar inan, imi-nia papél importante atu fó informasaun ba inan isinrua no inan ho oan, hodi hakbesik aan ba sentru saúde nune’e hetan atendimentu saúde ne’ebé di’ak,” Maria akresenta.
Iha fatin hanesan, Xefe Suku Licapat, Nelson da Cruz Casimiro agradese NGO HIM no Sentru Saúde Komunitária ba sira-nia kolaborasaun hodi fó formasaun ba membru GSI iha ninia suku.
“Ha’u hakarak hato’o agradese ua’in ba NGO HIM no Sentru Saúde Guisarudu ba sira-nia kooperasaun di’ak, hodi implementa programa formsaun ne’e ba ha’u-nia komunidade sira. Tanba ne’e, hein katak ho implementasaun programa ida ne’e sei fó mai ita, moris ida saudável,” líder komunitária ne’e salienta.
Entretantu, atividade refere hetan apoiu fundu husi Nasaun Unida Fundu Internasionál ba Labarik (UNICEF-sigla inglés) iha Timor-Leste no implementa husi HIM liu husi kooperasaun ho Ministériu Saúde.
Formasaun refere sei hala’o durante loron haat hahú husi 25 to 28 abríl tinan ne’e.
Jornalista: Filomeno Martins
Editora: Nelia Borges
