LAUTÉM, 25 abríl 2023 ( TATOLI)- Prezidente Kmanek Haburas Unidade Nasionál TimorOan (KHUNTO) Armanda Berta, hateten katak bainhira povu Munisípiu Lautém fó fiar hodi kaer Governasaun ida sei mai, KHUNTO sei dezenvolve área turizmu no agrikultura hodi diversifika ekonomia husi baze.
Kompromisiu Polítiku ne’e halo durante kampaña Partidu nian ne’ebé realiza iha Postu Administrativu Lautém, Munisípiu Lospalos.
“Iha Munisípiu Lospalos, Postu Admnistrativu Lautém iha poténsia ba área Turizmu maka Com, Tutuala, Jaco no Lore iha Postu Adminstrativu Lorehe hodi denvolve atu nune’e bele atrai turista, nune’e bele fó rendimentu ekonómia ba povu iha baze hodi diversifika ekonómia família, além ne’e Lautem mós iha poténsia agrikultura iha Postu Adminstrativu neen hanesan Lautém, Luro, Iliómar, Tutuala, Lospalos vila no Lorehe bele dezenvolve hodi kuda ai-han lokál oioin hodi asegura seguransa ai-han hodi labele depende demais ba produtu esterna, tanba ne’e karik povu Lautém fó fiar ba partidu KHUNTO hodi kaer ukun iha Governasaun Konstitusionál da sia KHUNTO sei prioritiza área turizmu no agrikultura hodi diversifika ekonomia husi baze,” Prezidente Partidu KHUNTO, Armanda Berta hato’o durante kampaña ne’ebé realiza iha Postu Adminstrativu Lautém Vila, iha tersa feira ne,e.
Prezidente Partidu ne’e haktuir, atu mellora atividade turizmu no agrikultura, sei intensiva treinamentu kapasitasaun ba area jestaun no dezenvolvimentu iha turizmu no agrikultura ba juventude Munisípiu Lautém hodi garantia sustentabilidade ekonomia no hadi’a sira-nia moris hosi baze.
Entretantu KHUNTO mós promote sei kontinua mellora programa xave sira ne’ebé antes ne’e implementa ona, hanesan: Programa Uma Naroman ba Povu ( UNP), bolsa da mãe jerasaun foun, bolsa méritu, fó bolsa studou ba ema kbiit la’ek, subsídiu 200 dolar, sesta bázika, subsídiu terseira idade, subsídiu ba veteran sira no programa gerál seluk mak hanesan infraestura bázika, Saúde, Edukasaun, Justisa, inklui programa ne’ebé fó benefísiu direta ba povu Timor – Leste.
Jornalista: Camilio de Sousa
Editora: Nelia Borges
