DILI, 26 abríl 2023 (TATOLI)- Diretór Munisípiu Ataúru trata asuntu Pre-Eskolár no Ensinu báziku, Januário De Araújo, informa, Edukasaun Ataúru sei inísia planu reabilitasaun no konstrusaun ba Pré-eskolár no Ensinu Báziku iha fulan juñu tinan ne’e.
Diretór Januario hateten daudaun ne’e seidauk inísia planu ba reabilitasaun no konstrusaun tanba prosesu identifikasaun sei la’o hela.
“Ami halo hela prosesu identifikasaun ba infraestrutura eskola nian, atu bele hatene di’ak liu kona-ba eskola hira mak presiza atu reabilita no eskola hira maka atu halo konstrusaun foun,” Diretór Januário De Araújo ba Tatoli, iha nia knar fatin, Vila Mau-Meta, Munisípiu Ataúru, kuarta ne’e.
Ezekutivu ne’e hatutan, atu hahú projetu ne’e, presiza tebes kooperasaun entre Ministériu Edukasaun Ataúro, Diretór Pré-eskolár no Diretór Ensinu Báziku sira, inklui mós komunidade.
“Ita presiza tebes koopera ho parte Diretór ensinu báziku no Pré- eskolár, inklui mós komunidade ka rai na’in sira atu bele idéntifika loloos rai eskola nian. Ministériu Edukasaun Ataúru seidauk iha dadus fixu ba ensinu pre-eskolár no ensinu báziku hira mak presiza atu reabilita no mós atu halo konstrusaun foun, bainhira rekolla hotu ona dadus ba eskola sira ne’ebé hetan estragu, mak sei aprezenta proposta ba autoridade munisípiu Ataúru hodi prevee orsamentu hodi utíliza,’’ Diretór ne’e hateten
Iha fatin hanesan, nia hateten hahú husi Timor- Leste hetan independénsia, Ministériu Edukasaun Sentrál mak reabilita ona eskola ensinu báziku tolu iha vila Mau-meta.
Alende kona-ba rekursu umanu hanesan profesór sira, Diretór ne’e hateten profesór sira iha munisípiu Ataúru sufisiente.
“Tuir dadus munisípiu Ataúru iha totál profesór husi ensinu báziku hamutuk 157, kompostu husi profesór permanente 67, kontratadu 67, voluntáriu no kontratadu 23 no profesór ba ensinu pre-Eskolár totál hamutuk 34 kompostu husi Mane rua no feto 32, husi númeru ne’e permanente ualu, kontratadu 17 no voluntáriu 9,” nia konklui.
Jornalista : José Belarmino De Sá
Editora : Nelia Borges
