DILI, 28 abril 2023 (TATOLI) – Líder Komunitária husi suku lima – Fatubolu, Licapat, Mau-Ubu, Urahou no Fatubesi agradese VIII Governu Konstitusionál lideradu ba dezenvolvimentu ne’ebé mak hala’o iha Postu Administrativu Hatulia B, Munisípiu Ermera.
Durante mandatu VIII Governu Konstitusionál, lideradu husi Primeiru Ministru, Taur Matan Ruak, estabelese ona Hatulia B nu’udar Postu Administrativu foun ida iha Munisípiu Ermera, kompostu husi suku lima refere.
Postu Adminsitrativu Hatulia B harii hafoin Konsellu Ministru halo aprovasaun hodi separa suku lima husi Hatulia A.
Hafoin deklara nu’udar postu administrativu foun, Governu atinji susesu bo’ot liuhusi harii Sentru Saúde Komunitária bo’ot ho fasilidade no rekursu umanu kompletu, harii edifísiu foun ba postu administrativu foun Hatulia B, harii Edifísiu foun ba Ensinu Sekundária Tékniku Vokasionál (ESTV) Guisarudu no seluktan.
“Ha’u agradese ba governu tanba ami bele moris ona nu’udar postu administrativu foun. Nune’e mós ho Governu atuál nia programa, ita bele lori Estrada alkatraun husi Ermera vila ba to’o Suku Fatubesi. No, ho Governu atuál nia programa, liuhusi Ministériu Saúde, ita harii ona Sentru Saúde bo’ot ida ba Suku lima. Uluk komunidade moras ami tenke lori dook ba Ermera Vila no Gleno, maibé ohin Governu harii ona Sentru Saúde bo’ot ida ba ami,” Xefe Suku Urahou, Alberto Soares hato’o agradese ba governu durante dialógu komunitária ho Ministru MAPKOMS, Francisco Jerónimo, iha Suku Licapat, Postu administrativu Hatulia B, Munisípiu Ermera, sesta ne’e.
Iha fatin hanesan, Xefe Suku Fatubolu, Adelino dos Santos mós agradese Ministériu Saúde hodi harii Sentru Saúde. “Ha’u mós agradese ba governu atuál liuhusi Ministériu Administrasaun Estatál (MAE) harii ona Postu Administrativu foun ida ne’e.”
Nia dehan, postu administrasaun foun ne’e sei fasilita tebes komunidade sira atu trata dokumentu, no trata asuntu importante seluk.
“Ha’u apresia VIII Governu konstitusionál ba ninia planu no programa sira. Ba oin tenke la’o nafatin ho programa sira ne’e atu halo dezenvolvimentu iha baze,” líder komunitária ne’e akresenta.
Hatán ba apresiasaun no agradesimentu komunidade nian, Ministru Francisco hateten katak objetivu prinsipál husi estabelesimentu postu administrativu foun atu hasai povu husi izoladu.
“Administrasaun ne’e ita fahe sai ki’ik, serbisu lais liu no lakleur ita la izoladu ona. Entaun governu ida ne’e hakarak burokrasia ne’e labele naruk liu. Administrasaun tenke badak atu povu ne’e lalais asesu ba administrasaun” Governante ne’e salienta.
Governante ne’e dehan, bainhira postu administrativu bo’ot ida fahe tiha ba rua mak povu ne’e sente duni dezenvolvimentu no tanba povu nia problema bele imediata rezolve ho lalais.
Jornalist: Filomeno Martins
Editora. : Nelia Borges
