AINARO, 04 Abríl 2023 (TATOLI) – Diretora Ministériu Agrikultura no Peska (MAP) munisípiu Ainaro, Natália de Orleans Amaral, hateten Banku Mundiál fó apoiu millaun-1 ba Projetu Melloria Produtividade Agrikultura Sustentável (SAPIP, sigla iha inglés) iha 2021 hodi ajuda grupu-agrikultór hamutuk 174 hodi hasa’e produsaun animál ihaTimor-Leste.
“SAPIP apoiu orsamentu ho millaun-1 ba grupu-agrikultór hodi haki’ak animál atu asegura nia produsaun. Desde 2021, halo ona distribuisaun orsamentu no agora tékniku MAP nian akompaña hela grupu sira ne’e oinsá haki’ak animal ho di’ak, halo animál nia luhan ho di’ak no bainhira hetan moras ruma, ita bele fo asisténsia liuhusi vasinasaun”, Natália de Orleãs Amaral informa ba Ajénsia Tatoli, iha Maulore, Ainaro Vila.
Tuir dirijente, distribuisaun orsamentu ne’e grupu agrikultór sira mak simu rasik no MAP munisipál hanesan implementadór ba programa ne’e fasilita de’it apoiu tékniku.
Implementasaun programa SAPIP ho objetivu atu hadi’a rendimentu, seguransa ai-han, nutrisaun komunidade sira nian no atu hadi’a investimentu setór públiku ne’ebé lideradu husi Governu hodi aumenta produtividade agríkola.
Programa ne’e mós sei kapasita agrukultór sira kona-ba maneira kuda no haki’ak animál ho di’ak, fasilita asesu produtu ba merkadu nomós reforsa intitusaun Governu hodi halo investigasaun adaptativa, hamenus risku no vulnerabilidade, hadi’a meiu subsisténsia rurál iha setór naun-agrikultura.
Projetu SAPIP apoia no fasilita asisténsia téknika ba dezenvolvimentu agríkola munisipál, inisiativa sira hodi dezenvolve setór agrikultura, hadia infraestrutura ho eskala ki’ik nomós apoia ekipamentu agríkola no dezeña planu, finansiamentu no akompaña grupu agrikutór sira liuhusi koordenasaun ho MAP.
Jornalista: Afonso do Rosário
Editora: Isaura Lemos de Deus
