PR sei dezenvolve tradisaun foti ‘Mechi’ hanesan atividade turístika
LAUTÉM, 04 maiu 2023 (TATOLI)- Partidu polítiku ho númeru sorteiu 9 iha Eleisaun Parlamentár 2023, sei dezenvolve tradisaun foti “Mechi” (Ular tasi) hanesan dezenvolvimentu turizmu iha Munisípiu Lautém, hodi atrai turista lokál no internasionál sira atu mai vizita Munisípiu Lautém no haree direita prosesu foti “Mechi” iha Lautém.
Sekretária Partidu Republikanu (PR), Costantina Pires, via telefone, kinta ne’e, hateten, PR kansela nia atividade kampaña polítika iha Munisípiu Lautém, ne’ebé tuir loloos realiza iha dia 4 abril maibé la konsege realiza tanba fallansu tékniku.
“Karik povu Lautém fó fiar ba PR iha Eleisaun Parlamentár 21 maiu hodi kaer Governu, PR sei fó prioridade ba dezenvolvimentu turizmu iha Munisípiu Lautém liu-liu tradisaun foti ‘Mechi’ ne’ebé tinan-tinan sempre hala’o iha Munisípiu Lautém,” nia garante.
Nia haktuir, PR hakarak dezenvolve tradisaun ne’e hodi atrai turista lokál no internasionál sira hodi mai asiste direta nune’e bele fó rendimentu no diversifika komunidade nia ekonomia iha Munisípiu Lautém.
Alende dezenvolve tradisaun foti ‘mechi’, Partidu ho lema kampaña “Bok an” ne’e mós sei tau prioridade ba nia programa xave sira mak hanesan promove ai-han lokál hanesan batar, ai-firina no produtu lokál sira seluk sai hanesan hahán tradisionál ne’ebé iha nutrisaun.
Entretantu, Sekretária Partidu Republikanu ne’e, informa, tuir oráriu ne’ebé publika hosi CNE, PR sei hala’o nia kampaña iha Munisípiu Lautém iha kinta, maibé tanba kestaun tékniku maka kampaña refere la konsege realiza.
Notísia relevante:Partidu Republikanu fo prioridade ba dezenvolvimentu nasaun hahú hosi Dili
Journalista: Camilio de Sousa
Editor : Nelia Borges
