ERMERA, 03 maiu 2023 (TATOLI) – Prezidente Partidu Libertasaun Populár (PLP), Taur Matan Ruak husu kafekultór hosi Postu Administrativu Hatulia B, Munisípiu Ermera atu kontinua kuda kafé no garante katak folin kafé sei di’ak iha futuru.
Prezidente PLP ne’e, enkoraza kafekultór sira, atu kontinua kuda kafé no labele hein kafé folin sa’e maka kuda.
“Agora mak kafé folin la di’ak, se hein folin di’ak mak kuda ne’e atrazu ona. Kuda agora, tanba rai mak lori,” Líder masimu PLP ne’e hateten.
Líder rezisténsia ne’e konta tuir katak, iha Hotel Timor, kafé xikra ida ninia kustu $7, no iha Japaun Xikra ida kustu $9 no iha Austrália, kafé kilu 1 besik AU$23 dolar Australia ou $18 dolar Amérika.
Atu hadi’a folin kafé iha futuru, Taur dehan.” Ita-nia kafé labele estraga no labele husik”nia subliña.
Tinan kotuk Governu atuál lideradu husi Primeiru Ministru Taur Matan Ruak, aloka osan hamtuk $6,4 biliaun hodi halo rehabilitasaun ba kafé tuan sira.
“Entaun ita rehabilita plantasaun kafé hektares hamutuk 7,500. Iha Ermera de’it ita rehabilita hektares hamutuk 3,000. Kafé nain simu $300 kada hektare no kuda ai-oan simu $200 nune’e hektare ida simu $500 husi Sekretária Estadu Meiu Ambiente. Kundu kafé fuan, subsídiu ne’e laiha ona. Ida ne’e atu ajuda rehabilita imi nia kafé fuan fila fali,” Taur relata.
Durante ámbitu kampaña eleitorál, autoridade lokál hosi Postu Administrativu Hatulia B husu ba governu tuirmai atu tau mós atensaun ba kafé folin.
Enkuantu, Xefe Suku Fatubesi, Postu Administrativu Hatulia B, Armando de Carvalho husu ba governu atuál no IX governu atu deside kafé folin ne’ebé justu hodi hadi’a kafekultór sira-nia moris.
“Hanesan autoridade lokál suku Fatubesi, hau husu ba governu atuál no mós governu tuir mai deside presu folin kafé iha munisípiu Ermera, tanba komundade sira iha hanoin atu hadi’a kafé, maibé kestaun folin kafé durante ne’e halo sira laiha interese atu had’ia kafé,” Xefe Suku Armando apela.
Jornalista: Filomeno Martins
Editora: Nelia Borges
