LAUTEM, 09 maiu 2023 ( TATOLI) – Partido Unidade Nacional Demokratika da Resistencia Timorense ( UNDERTIM) sei harii portu indústria peskas iha suku Laivai Munisípiu Lautém.
Sekretáriu Jerál UNDERTIM, Adolfo da Silva Watumissa, hateten katak UNDERTIM nia programa prioridade ba Munisípiu Lautém mak sei konstrui portu indústria peskas iha suku Laivai hodi fasilita peskadór Lautém oan sira, hodi bele prosesa sira-nia ikan ba faan iha merkadu lokál no merkado internasionál.
“Lautém oan barak mak sai peskadór maibé sira-nia ikan la folin tanba laiha merkadu. Tanba ne’e karik povu Lautém fó fiar UNDERTIM hodi kaer ukun, sei harii portu indústria peskas ida iha suku Laivai hodi prosesa peskadór sira-nia ikan ba faan iha merkadu lokál no internasionál ho nune’e bele diversifika ekonómia família, hodi kontribui ba dezenvolvimentu nasionál,” SecJer UNDERTIM, Adolfo Watumissa, informa ba Tatoli via telefone tersa ne’e.
Nia esplika portu indústria peskas iha Laivai ne,e sai hanesan sentru prosesamentu ikan husi peakadór sira iha suku sira hanesan Laivai, Liarafa, Lautém vila, Com no fatin seluk ne,ebé besik iha tasi ibun Lauté m hodi mai hatama sira-nia ikan iha portu indústria peskas.
“Ita tenke fasilita ita-nia peskadór sira ho dignu tanba ne,e UNDERTIM kompromete sei harii duni portu indústria peskas ida iha Laivai atu ikan sira ne,e labele estraga de’it. Ho ida ne’e maka uainhira portu indústria ne,e existe sei fó esperansa ba peskadór Lautém oan sira ” nia dehan.
Journalista: Camilio de Sousa
Editora: Nelia Borges
