ERMERA, 15 maiu 2023 (TATOLI) – Ministériu Saúde serbisu hamutuk ho Ajénsia Korean aba Kooperasaun Internasionál (KOICA, sigla inglés) no Asosiasaun Nasionál Tuberkuloze Korea (KNTA, sigla inglés) realiza kapasitasaun no jestaun tuberkuloze ba komunidade iha Munisípiu Ermera.
Objetivu husi atividade ne’e, atu hasa’e komunidade sira-nia koñesimentu hodi luta hamutuk atinji mehi Timor-Leste nian, kona-ba eliminasaun TB iha 2025.
Xefe Unidade Programa Tuberkuloze Nasionál husi Ministériu Saúde, Costantino Lopes haktuir katak kooperasaun ida ne’e atu hasa’e mós kapasidade komunidade nian hodi identifika kazu TB iha komunidade nia leet.
“Partisipante 200 resin ne’ebé mak partisipa ativiadade ne’e la’ós de’it pesoál saúde de’it maibé inklui mós xefe suku, no xefe aldeia ne’ebé sei serbisu voluntariamente kada loron atu identifika no akompaña komunidade ne’ebé sofre moras TB, hodi hakbesik ba fasilidade saúde hodi simu tratamentu,” Costantino ba Tatoli, iha Salaun Parkial, Gleno, Munisípiu Ermera, segunda ne’e.
Iha 2021, Primeiru Ministru Taur Matan Ruak, no Ministra Saúde Odete Belo halo kompromisu hodi elimina TB iha 2025. “Aliña ho kompromisu Primeiru Ministru nian, mak hamutuk ho pesoál saúde sira ami halo kapasitasaun ba komunidade sira hodi deteta kazu TB lalais iha komunidade nian leet no fó tratamentu, asegura to’o sira-nia tratamentu remata no mós halo preventiva ba sira-nia família.”
Jestór ne’e haktuir, partisipante sira mai husi postu neen iha munisípiu Ermera mak hanesan Railako, Ermera, Letefoho, Atsabe, Hatulia A no Hatulia B.
“Atu atinji mehi eliminasaun ba TB iha 2025, ita tenke tau forsa hamutuk no serbisu hamutuk hanesan ekipa ida, tanba ida ne’e mak xave para elimina TB iha Ermera,” Costantino akresenta.
Iha fatin hanesan, Koordenadór Programa TB Munisípiu Ermera, Natalino de Araújo Salsinha, informa katak iha trimester primeiru iha tinan 2023, munisípiu Ermera rejista kazu TB hamtuk 87. “Iha tinan 2022, ita rejista kazu hamutuk 502.”
“Programa ida ne’e atu fahe hanoin ba partisipante sira, hodi deteta kazu TB barak liu tán iha munisípiu Ermera. Atu nune’e, sira fila fó hatene komunidade hodi hakbesik an ba fasilidade saúde atu hetan tratamentu,” nia salienta.
Nune’e mós, Jestór Projetu KOICA, Hee Joo Lee hateten, atividade workshop ne’e importante atu fahe informasaun kona-ba oinsá mak halo jestaun ba pasiente TB iha komunidade, no buka dalan atu hasa’e teste TB no tratamentu iha fasilidade saúde sira Ermera.
“Maske TB hanesan problema sosiál, ekonómiku, no saúde públika iha mundu tomak, maibé moras ne’e bele kura liuhusi esforsu sira hanesan deskansa adekuadu, konsumu ai-han nutrisaun, no kompleta tratamentu fulan ne’e,” nia esplika.
Notísia relevante:MS avalia progresu servisu no prepara estratéjia kombate kazu TBC
Jornalista: Filomeno Martins
Editora: Nelia Borges
