MALIANA, 16 maiu 2023 (TATOLI) – Servisu Rejistrasaun no Verifikasaun Emprezariál (SERVE), rejista ona empreza foun hosi sidadaun timoroan, Esmeralda Cristina, ho tipu empreza unipesoál limitada.
Antes ne’e Kámara Komérsiu no Indústria Timor-Leste, Munisípiu Bobonaro, krítika empreza Hong Takhasoe ne’ebé halo investimentu prodús bloku iha área Mau-Mali, aldeia Samelau, suku Ritabou, postu administrativu Maliana, tanba empreza ne’e rasik investe ho 10% no 90% sósiu ho empreza xinés na’in-rua.
Maibé Jerente SERVE,I.P sukursál Bobonaro, Leopoldo Perreira Fernandes, informa, daudaun ne’e sidadaun timoroan Esmeralda Cristina ne’ebé kaben ho sidadaun xinés hodi harii empreza ne’e, deside submete fali pedidu ba SERVE hodi loke foun fali tipu empreza sosiedade unipesoál por quotas limitada ka unipesoál Lda.
Notísia relevante: CCI Bobonaro rejeita emprezáriu Xinés loke fábrika batako iha Mau-Mali
“Señora ne’e mai aplika fali rejistu foun uza nia naran Esmeralda Cristina naran rasik unipsesoál lda, ne’ebé nia naran ne’e sei hein verifikasaun no aprovasaun hosi konservadór ba rejistu komersiál hosi SERVE,I.P nasionál,” nia informa ba Tatoli, iha Maliana, tersa ne’e.
Leopoldo esklarese, antese ne’e konservadór rejistu komersiál SERVE atribui sertidaun rejistu komersiál ba empreza refere tanba bazea sira-nia estatutu ne’ebé hetan legalizasaun hosi notariaidu.
Nia subliña, iha estatutu ne’e deklara na’in ba empreza Hong Takachay investe iha kapitál sosiál ho 10% no 90% sósiu ho empreza estranjeiru na’in-rua hanesan Wuei Huan Hon 45% no SueFhe 45%.
Koordenadór ne’e dehan, SERVE ho pozisaun ne’e bazea ba dekretu-lei númeru 83/2022, 23 novembru, ne’ebé hetan alterasaun dahuluk hosi dekretu-lei númeru 34/2017, 27 setembru kona-bá lisensiamentu atividade ekonómiku.
Iha artigu 12 ko’alia kona-bá dokumentu nesesáriu sira-ne’ebé prepara hodi entidade ida mai loke nia atividade negósiu timoroan ka estranjeiru iha territóriu Timor-Leste.
Enkuantu iha artigu 12 ne’e mós husu atu sira aprezenta dukumentu nesesariu sira, primeiru tenke iha estatutu ba kompañia tenke iha kartaun identifikasaun, sé ema ne’e estranjeiru nia tenke iha pasaporte, kartaun rezidénsia hafoin viza traballu no sé ema ne’e kaben-na’in nia tenke komprova mós ho sertidaun kazamentu.
“Entaun iha okaziaun ida-ne’e sira prienxe rekizitu ne’ebé temi iha dekretu-lei ida-ne’e, entaun SERVE nafatin fasilita no halo rejistu ba sira-nia negósiu refere,” Leopoldo esklarese.
Notísia relevante: CCI husu Autoridade Bobonaro regula Xinés sira loke negósiu kiik
Jornalista: Sergio da Cruz
Editór: Evaristo Soares Martins
