DILI, 25 maiu 2023 (TATOLI) – Estudante na’in-lima husi Departamentu Indústria, Fakuldade Enjeñaria, Universidade da Paz (UNPAZ) hetan bolsa estudu durasaun badak hodi partisipa semestre ida iha Universidade Brawijaya Indonézia.
Reitór UNPAZ, Adolmando Amaral, hetete hafoin estudante sira finaliza semestre ida iha Brawijaya, universidade refere sei haruka nia dosente sira hodi apoia fali prosesu aprendizajen iha UNPAZ.
“Bolsa estudu ne’ebé Universidade Brawijaya oferese mai UNPAZ ne’e fó diretamente ba Fakuldade Enjeñaria, espesialmente ba Departamentu Indústria tanba durante ne’e kooperasaun entre Fakuldade enjeñaria husi Universidade rua ne’e la’o di’ak tebes,” dehan Adolmando ba ajénsia Tatoli iha kampus UNPAZ Ai-mutin, kinta ne’e.
Kooperasaun entre UNPAZ no Brawijaya ne’e mosu bainhira hahú ho atividade palestra hamutuk maka Brawijaya foti desizaun ida hodi loke oportunidade oferese bolsa refere ba Departamentu Indústria.
Reitór salienta katak estudante na’in-10 husi Departamentu Indústria maka interese loos hakarak bá estuda iha Indonézia, maibé iha prosesu teste na’in ualu de’it maka partisipa no rezultadu ikus lima maka pasa. “Naran estudante na’in-lima ne’e Universidade da Paz tenke submete ona atu Brawijaya bele rejista ona hodi hein agostu tinan ne’e sira bele hahú ona prosesu aprendizajen”.
Adolmando haktuir katak estudante na’in-lima ne’e Mónica da Cruz, Ruben da Costa, Carel Pereira, Francisco Charles no Américo Tomas.
“Ita-nia estudante sira ne’e maka hetan uluk oportunidade hodi bá hala’o estudu. Tuirmai bele loke fali ba dosente sira no sei servisu hamutuk iha área peskiza nian”, afirma.
Jornalista: Tomé Amado
Editora: Maria Auxiliadora
