MAE la konsege realiza eleisaun ba prezidente autoridade-deputadu lokál
DILI, 07 junu 2023 (TATOLI)—Ministru Administrasaun Estatál (MAE), Miguel Pereira de Carvalho, hateten iha programa VIII Governu Konstitusionál ne’e la konsege realiza eleisaun ba prezidente autoridade no deputadu lokál ne’ebé atu halo eleisaun iha munisípiu Ermera, Aileu no Liquiça.
Notísia Relevante: Eleisaun ba prezidente autoridade-deputadu lokál depende ba pakote lejislativa haat
“Ami la konsege realiza eleisaun maibé konsege halo esforsu sira-ne’ebé atu konklui kuadru legál desentralizasaun administrativa ba poder lokál mak lei tolu ne’e. Nune’e, ha’u hanoin Governu tuir mai presiza halo planu hodi bele realiza eleisaun ne’e,” Ministru Miguel hateten ba jornalista sira iha Palásiu Governu, kuarta ne’e.
Tanba, tuir nia, buat ida defisil liua mak prepara lei no munisípiu sira hodi ba infraestrutura mínimu maibé ohin loron bele hakat ona ba poder lokál.
“Agora atu realiza ne’e, ha’u espera ne’e desizaun polítika,” Miguel dehan.
Maibé, nia hateten, iha VIII Governu Konstitusionál nia mandatu ne’e, MAE halo lei tolu hodi estabelese poder lokál ne’ebé hetan aprovadu iha Parlamentu Nasionál no promulga hosi Prezidente Repúblika mak Lei poder lokál Administrasaun Administrativa, Lei Eleisaun munisipál no Lei Finansa Munisipál.
Miguel hatutan, iha tinan ikus projetu 1.800 infraestrutura rurál ne’ebé suku sira mak halo, tanba suku ida iha osan kuaze $450.000, hosi osan ne’e mak halo eskola rurál ne’e de’it hamutuk rihun $200 no aumenta tan Uma Naronam ba Povu ho osan $200.000, depois PNDS regular rihun $50.
Notísia Relevante: PN Aprova Lei Poder Lokál
“Entaun, hosi ne’e, ha’u bele dehan iha evulusaun boot iha nível dezenvolvimentu komunitária,” nia hateten.
Maibé, hosi programa ne’ebé VIII Governu iha ba MAE ne’e, iha balun ne’ebé seidauk finaliza maibé ida-ne’e, nia parte labele rekomenda ba Governu foun tanba Governu ida-idak mai ho nia programa rasik.
“Maibé ha’u hanoin governasaun ne’ebé di’ak mak sempre rona nia populasaun nia hakarak no fiar katak populasaun barak mak iha baze. Tanba, buat ne’ebé ha’u ko’alia ne’e di’ak ba povu, tanba ne’e ha’u hanoin presiza kontinua tanba povu mak sai benefísiu direita,” nia hateten.
Notísia Relevante: PN aprova proposta-lei finansa munisipál iha finál globál
Jornalista : Osória Marques
Editór : Cancio Ximenes
