Estoke kombustível iha Oé-cusse hahú menus
OÉ-CUSSE, 09 juñu 2022 (TATOLI) – Sentru kombustível (pertamina) Irmão Timor Unipesoál Lda, hahú limita sidadaun hotu inklui vendedór sira iha Rejiaun Administrativa Espesiál Oé-Cusse Ambeno (RAEOA) ense gazoliña no gazoel iha jerigen tanba estoke hahú menus.
Notísia relevante: Estasaun kombustível iha Dili taka tanba estoke mina hotu
Lamberto Colo, hanesan traballadór iha sentru kombustivé kompañia Irmão Timor, informa, sira simu orientasaun ne’e hosi diretór kompañia atu labele fa’an gazolina no gazoel ho jerigen tanba estoke hahú menus.
“Komesa kinta, patraun orienta ami atu labele simu ona jerigen, kuandu mai ense de’it tantu motorizada no karreta, tanba estoke hahú menus, maibé kona-bá jerigen ho sasán boot, la autoriza,” nia dehan ba Agência Tatoli iha Sikluli, suku Costa, Oé-Cusse, sesta ne’e.
Nia hateten, folin normál hanesan baibain, antes ne’e fa’an gazolina litru ida ho folin $1,35 hanesan mós ho gazoel, maibé laiha autorizasaun ba sidadaun hotu atu mai sosa uza jerigen kuandu akua bele, maibé ida de’it labele liu.
Tanba patrão dehan, kuandu autoriza ense ho jerigen, bele akontese manipulasaun folin kombustível, tanba daudaun ne’e, iha nasionál hahú krize, no mosu ona manipulasaun folin.
Kona-bá kestaun ne’e, Agência Tatoli tenta konfirma ho diretór kompañia Irmão Timor Unipesoál Lda, Julio Mak, maibé laiha fatin tanba daudaun ne’e iha hela estranjeiru.
Iha fatin seluk, Hiliário Meni, hanesan negosiante bainbain fa’an gazoel no gazolina iha merkadu Numbei, informa, maske estoke kombustível menus, maibé nu’udar negosiante fa’an ho folin normál.
“Loos, ami ba la autoriza ona, bainbain ami hola iha Irmão Timor mak mai fa’an fali iha-ne’e, maibé dezde horbainruak to’o ohin la autoriza ona atu hola ho jerigen, agora ami fa’an de’it ida-ne’e kuandu to’o hotu, ami la fa’an ona, tanba dehan estoke menus,” nia informa.
“Ami fa’an ho folin normál, uluk masa akua nanotak $1, kuandu nakonu $2, agora nafatin tanba ta’uk orsida ema bele mai keixa fali ami, tanba ami ne’e fa’an nanis ona, kuandu ita halo hanesan ne’e, orsida polísia mai investiga karik, atu ko’alia oinsá, ne’ebé ami fa’an ho folin normál,” nia dehan.
Razaun hanesan mós hosi Julio Neno, hanesan sofer mikrolete, informa, situasaun ein-jerál iha Oé-Cusse, la’o normál, laiha krize kona-bá kombustivél.
“Ami laiha problema, halai nafatin, folin mina mós normál, dadeer ami halai lokraik ba ense kedas, só ami to’o pertamina, sira aviza ami atu labele lori jerigen atu ense, tanba estoke menus, kuandu ense bele, maibé atu lori ba uma la autoriza,” nia katak.
Notísia relevante: ANPM konfirma semana oin estoke kombustível bele normál fali
Jornalista: Abílio Elo Nini
Editór: Evaristo Soares Martins
