Governu foun presiza reabilita irrigasaun Maliana II
MALIANA, 19 juñu 2023 (TATOLI) – Autoridade lokál no abitante suku Tapo-Memo, postu administrativu Maliana, munisípiu Bobonaro, husu ba Governu foun presiza tau atensaun hodi halo reabilitasaun ba irrigasaun Maliana II tanba kondisaun infraestrutura aat kuaze 85% ona.
Xefe suku Tapo-Memo, Joaquim Baptista, hateten irrigasaun refere konstrui iha tempu okupasaun Indonézia no kondisaun aat no la funsiona dezde tinan 2011.
Nia hatutan, proposta ba reabilitasaun irrigasaun ne’e autoridade lokál no komunidade hato’o beibeik ba Ministériu Agrikultura no Peska no informa direita ba Primeiru Ministru, Taur Matan Rua, maibé to’o agora seidauk iha asaun ruma.
Notísia relevante: MAP ke’e ona kanál irrigasaun tradisionál iha Tapo-Memo
“Ami husu ba Governu foun atubele tau matan, tanba povu halerik ba irrigasaun, tanba kuandu irrigasaun di’ak povu bele halo natar ho di’ak, bele hetan rezultadu mós ho di’ak, sira bele kolleta hare kada ektare ne’e tonelada haat ka lima,” nia informa ba jornalista sira iha Maliana.
Xefe suku Joaquim subliña, durante ne’e rai preparadu hela, maibé tanba irrigasaun la di’ak, obrigatóriu agrikultór sira halai natar époka dahuluk de’it.
“Ita halo komparasaun rai iha tempu okupasaun hahán sufisiente, maibé agora 85% povu tenke buka hahán iha suku ka postu sira seluk, tanba agora daudaun ne’e ninia produtu la sufisente ba povu atu haan,” nia hateten.
Calistro Lopes nu’udar abitante, sente triste tanba irrigasaun ne’e governu ho ajénsia balu maibé halo observasaun beibeik maibé laiha seriedade atu rezolve.
“Ami haree ministru mak troka beibeik, mai haree hela de’it, nunka atende, ida-ne’e ba ami povu la sente di’ak, tanba bee la aguenta ba ami halo Natar,” nia dehan.
Enkuantu tuir observasaun Ajénsia Tatoli iha terrenu notak katak, rekursu bee hosi mota Malibaka sufisiente hela, maibé tahu no rai-henek taka metin kanál hahú kedas iha portaun boot to’o intek primeiru, difikulta volume bee atu sulin ba irrigasaun laran fahe ba komunidade agrikultór nia natar.
Notisia relevante: Komunidade Maliana Halerik Kondisaun Estrada-Irrigasaun
Jornalista : Sérgio da Cruz
Editór : Evaristo Soares Martins
