DILI, 22 juñu 2023 (TATOLI) – Partidu FRETILIN hakarak kontribui ho forma konstrutiva iha Parlamentu Nasionál (PN) hodi haree ba interese nasionál, nune’e lori dezenvimentu no moris di’ak ba povu tomak.
“FRETILIN sei sai opozisaun ida konstrutiva hodi apoiu programa Governu Dasiak nian, tanba FRETILIN hakarak dezenvolve nasaun ne’e hodi lori moris di’ak ba povu”, líder nasional Lere Anan Timur hatete iha ámbitu sesun solene sesta lejislatura iha PN, kinta ne’e.
Nia dehan sai opozisaun ida konstrutiva ne’e devér no obrigasaun FRETILIN nian ne’ebé mai kedan husi inísiu la’ós foin mak akontese, maibé dezde partidu halo luta ho objetivu mak atu liberta pátria no liberta povu husi ki’ak no mukit.
Tanba ne’e, pozisaun partidu nian hakarak atu tane interese Estadu aas liu interese partidária no ema ida nian, tanba deputadu iha sesta lejislatura ne’e reprezenta povu tomak nian.
Nune’e, Lere Anan Timur salienta katak maske nia naran tama iha lista nu’udar deputadu iha lejislatura refere, maibé nia iha ona kandidatu seluk mak substitui nia fatin.
“Tanba tuir rejimentu Parlamentu nian katak depois juramentu tiha maka foin hatama pedidu substituisaun. Ne’ebé ha’u kumpre ona rejimentu ne’e no tuir lista ne’ebé iha deputadu Dário Madeira mak substitui ha’u-nia fatin”, katak.
Iha sorin seluk, Prezidente Partidu FRETILIN, Francisco Guterres ‘Lú Olo’, hatete povu hili deputadu FRETILIN atu sai opozisaun ne’ebé mai ho forma konstrutiva iha sesta lejislatura ne’e.
“Povu hili ami hosi FRETILIN atu sai opozisaun iha Parlamentu Nasionál no klaru opozisaun ne’e sempre iha [hanoin] konstrutiva”, nia afirma.
Iha sesta lejislatura ne’e deputadu CNRT okupa kadeira 31, Partidu FRETILIN 19, Patidu Demokrátiku neen, KHUNTO lima no PLP haat.
Jornalista: Tomé Amado
Editora: Maria Auxiliadora
