Lú Olo: Povu hili Deputadu FRETILIN sai opozisaun konstrutiva
DILI, 22 junu 2023 (TATOLI)—Prezidente Partidu FRETILIN, Francisco Guterres “Lú Olo”, hateten povu hili deputadu FRETILIN sai opozisaun ne’ebé konstrutiva iha sesta lejislatura ne’e.
Notísia Relevante: Aniceto Guterres dezeja Deputadu foun lejislatura daneen
“Povu hili ami hosi FRETILIN atu sai opozisaun iha iha Parlamentu Nasionál no klaru opozisaun ne’e sempre iha konstrutivu, povu hili ida konstrutivu nian,” Prezidente Partidu FRETILIN, Francisco Guterres Lú Olo, hateten ba jornalista sira iha resintu Parlamentu Nasionál, kinta ne’e.
Tanba, eis Prezidente Repúblika ne’e hateten, sai deputadu no sai opozisaun ne’e povu mak deside.
“Votu hosi ha’u-nia militante no partidu ninian hodi ha’u mai tuur iha ne’e, tanba rai no povu ida-ne’e nian, hanesan deputadu,” Lú Olo hatete.
Tuir observasaun, iha resintu Parlamentu Nasionál katak Prezidente Partidu FRETILIN to’o iha bankada FRETILIN iha oras 10h00 no Sekretáriu Jerál FRETILIN Mari Alkatiri, to’o iha resintu Parlamentu Nasionál iha tuku 90h38 dadeersan.
Entretantu, tuir rezulatdu eleisaun parlamentár 21 maiu 2023 ne’e hatudu, Partidu CNRT ho númeru sorteiu 12 hetan totál votu hamutuk 288,298 (41,63%), Partidu FRETILIN ho númeru sorteiu 11 ho totál votu 178,338 (25.75%), Partidu Demokrátiku ho númeru sorteiu haat (4) ho totál votu 64,517 (9.32%), Partisu KHUNTO ho númeru sorteiu lima (5) ho totál votu 52,031 (7.51%), Partidu Libertasaun Populár (PLP) ho númeru sorteiu tolu (3) ho totál votu 40,720 (5.88%).
Partidu hirak ne’ebé la liu bareira iha eleisaun parlamentár 2023 ne’e mós ida-idak hetan totál votu mak hanesan, Partidu Os Verdes de Timor (PVT) ho númeru sorteiu neen (6) hetan totál votu hamutuk 25,106 (3.63%), PUDD ho númeru sorteiu ualu (8) ho totál votu 21,647 (3.13%), Partisu APMT ho númeru sorteiu 17 ho totál votu 6,678 (0.96%), PLPA ho númeru sorteiu daruak (2) ho totál votu 3,272 (0.47%),
Partidu CASDT ho númeru sorteiu 13 ho totál votu hamutuk 3,270 (0.46%), PST ho númeru sorteiu 13 ho totál votu 2,415 (0.35%), Partidu Repúblikanu (PR) ho númeru sorteiu sia (9) ho totál votu 1,558 (0.22%), PDC ho númeru sorteiu 16 ho totál votu 1,262 (0.18%), Partisu UDT ho númeru sorteiu hitu (7) ho totál votu 1,256 (0.18%), Partisu UNDERTIM ho númeru sorteiu 10 ho totál votu 1,023 (0.15%), Partidu MLPM ho númeru sorteiu 14 ho totál votu 642 (0.09%) no PDN ho númeru sorteiu dahuluk (1) ho totál votu 597 (0.09%).
Notísia Relevante: Ohin, PN realiza reuniaun plenária dahuluk ba lejislatura daneen
Jornalista : Osória Marques
EDitór : Cancio Ximenes
