COVALIMA, 23 juñu 2023 (TATOLI)–Xefe Investigasaun Polisia Nasional Timor-Leste Unidade Ema Vulneravél (PNTL-VPU) Covalima, Primeiru Sarjentu Amelia de Jesus Amarál, hateten hahú hosi fulan-janeiru to’o juñu 2023 ne’e PNTL-VPU Covalima rejista kazu hamutuk 32.
“Hahú fulan-janeiru to’o juñu tinan 2023 (PNTL-VPU) Covalima rejista kazu hamutuk 32. Hosi númeru ne’e, kazu violénsia Doméstika (VD) kontinua aas iha Munisípiu Covalima,” Primeiru Sarjentu Amelia de Jesus Amarál hatetetn liuhosi nia diskursu bainhira partisipa atividade hosi IPAKT iha suku Matai, postu Maucatar, sesta ne’e.
PNTL-VPU Covalima rejista kazu 32 ho nia tipu hanesan Violénsia Doméstika (VD), Abuzu seksuál ba menór, Asediu sexual, Maltratu ba menór abandona no hadau malu oan.
Autór sira-ne’ebé komete kazu ne’e, PNTL-VPU halo ona investigasaun no haruka ona sira-nia kazu ba Ministériu Públiku (MP) atu prosesa.
Ho nune’e, nia dehan, PNTL-VPU Covalima menus ona rejista kazu tanba ba tinan 2023 rejista kazu 32 de’it kompara iha tinan kotuk bele rejista kazu to’o 100-200.
“Ita redús ona kazu tanba ita mai fahe informasaun hahú hosi aldeia, suku to’o postu sira atu redús maibé la’os atu halakon total. Ho informasaun ne’e, komunidada bele komprende didi’ak iha ita-nia família no viziñu katak violénsia ne’e buat ladi’ak ida,” nia dehan.
Violénsia fízika, violénsia ekonómia, violénsia psikolojia no sexual ne’e akontese bainhira iha nia abut problema mai hosi inan-aman mak falta komunikasaun, laen ba toos halo servisu, feen sira hela iha uma joga karta ka halimar Bingo.
Jornalista : Celestina Teles
Editór : Cancio Ximenes
