OÉ-CUSSE, 28 juñu 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) lideradu Arsénio Paixão Bano, konfirma, konstrusaun ponte Bitopa ne’ebé lokaliza iha aldeia Buqui, suku Usitasa’e, sub-rejiaun Oésilo sei konklui iha fulan setembru tinan 2023 ne’e.
Notísia relevante: Progresu projetu ponte Bitopa-Noetoko liu ona 50%
Konstrusaun ponte ne’e rasik ho distánsia naruk metru 64 kompleta ho protesaun moru gabiaun metru 170, sei tulun komunidade suku sia mai hosi sub-rejiaun Oésilo, Pássabe no Nítibe atu uza hodi transporta produtu asesu ba merkadu iha tempu udan.
“Ha’u hanoin iha fulan tolu nia laran parese hotu, ohin ha’u liuhosi ponte Bitopa, nia progresu liu ona 50%, ne’e ita hatene katak, saida mak uza iha ponte ne’e aluminium milimeter 7 nian, ida-ne’e maka’as liu ponte Oébaha ho Kinloki ninian tanba ne’eba uza milimeter 5,” Arsénio Paixão Bano ba jornalista iha Oé-Cusse, kuarta ne’e.
Hosi ponte Oébaha ho Kinloke ne’e eziste kuaze tinan 30 ona, nune’e Autoridade halo ponte Bitopa bele eziste tinan barak mós, atu fasilita komunidade nia movimentu hosi área rurál ba vila liuliu iha tempu udan.
Diretór kompañia Am-Lhichoe Unipesoál Lda, Eurico da Rosa, garante sei bazea komitmentu no esforsu sei finaliza konstrusaun ponte Bitopa iha tempu badak, tanba laiha problema ho ekipamentu.
“Kona-bá Bitopa, prosesu atuál atinje 62,27%, tuir estimasaun haree iha terrenu, ita-bele aselera fulan ida-tán bele remata, tanba progresu fiziku, daudaun ne’e monta hela ekipamentu ponte nian sei konklui iha semana ne’e, no kontinua ba stonemasonry, atu kesi goron-gorong sira-ne’e,” nia garante.
Notísia relevante: Udan difikulta konstrusaun ponte Noetoko no Bitopa
Diretór Am-Lhichoe, informa problema ne’ebé durante ne’e kompañia enfrenta iha terrenu, tanba natureza ezekuta konstrusaun ne’e, ita tempu udan, afeta ba implementasaun, maibé kompañia konstinua esforsa ho inisiativa rasik, hodi halo normalizasaun ba bee iha mota hodi apoia servisu fíziku bele la’o ho susesu.
“Maibé ami garante, katak tuir estimasaun téknika bazea progresu ne’ebé iha, ita garante bele finaliza iha fulan ida ho balu,” nia promete.
Entretantu, kontrusaun ponte Bitopa kompañia Am-Lhichoe Unipesoál, Lda, ezekuta ho valór kontratu hamutuk $406,945.00, orsamentu ne’e, Autoridade RAEOA aloka hosi Orsamentu Jerál Estadu (OJE) 2022.
Notísia relevante: Autoridade lokál nia esperansa ba futuru konstrusaun ponte Bitopa-Noetoko
Jornalista : Abílio Elo Nini
Editór : Evaristo Soares Martins
