DILI, 28 juñu 2023 (TATOLI) – Ministériu Ensinu Superiór, Siénsia no Kultura (MESSK) konstrui edifísiu foun hodi kria kondisaun ba funsionáriu sira atu hala’o knaar ho di’ak.
Instalasaun foun ho andár ida ne’e iha sala ba serbisu neen kompleta ho sala ida ba diretór no kargu xefia, sentru impresaun ida atu fasilita serbisu administrasaun, salaun multifunsaun ida, salaun konferénsia ida, hariis-fatin ualu no rampa asesibilidade ba ema ho defisiénsia.
Diretór-Jerál Administrasaun no Finansa husi MESSK, Hernânio Viterbo Soares, informa katak edifísiu foun ne’e inaugura ona husi Ministru Ensinu Superiór Siénsia no Kultura, Longuinhos dos Santos.
“Molok ita atu implementa obra ne’e, ita hatama ona planu sira liuhusi Orsamentu Jerál Estadu 2022. Konstrusaun edifísiu MESSK nian ne’e, ita hahú ho faze levantamentu terrenu ba obra ne’ebé halo”, Hernânio Viterbo dehan iha serimónia inaugurasaun edifísiu foun MESSK, horisehik.
Nia dehan elaborasaun dezeñu sira kona-ba obra edifísiu foun ne’e ministériu submete uluk dokumentu sira hansan planta no kadernu enkargu (BoQ) ba Ministériu Obra Públika, liuhusi Diresaun Nasionál Edifikasaun atu haree depois maka foin aprezenta ba Ajénsia Dezenvolvimentu Nasional (ADN). Total montante orsamentu ne’ebé maka MESSK simu husi avaliasaun no verifikasaun ADN nian hamutuk rihun $272.
“Konstrusaun ne’e ninia konkursu loke hahú iha juñu 2022 no konsege hetan konsultór ida ba obra ne’e maka kompañia AKIS Unipesoal ho montante orsamentu ne’ebé kompañia propoin ba konstrusaun edifísiu foun ho montante rihun $246”, katak.
Métodu konstrusaun ba edifísiu MESSK nian ne’e uza precast hodi didin, tanba métodu ne’e oferese vantajen relasiona ho durasaun obra nian. Konstrusaun ne’e hala’o to’o atinje ninia finalidade hetan supervizaun husi Ministériu Obra Públika no ADN.
Pagamentu ba konstrusaun ne’e halo bazeia ba ninia progresu sira tuir faze. Nune’e ministériu selu ona ba empreza besik rihun $140 husi totál orsamentu $246 ne’ebé kompañia propoin.
“Ita sei iha metade orsamentu ne’ebé asegura hela bainhira konstrusaun ne’e tama ona iha verifikasaun finál hosi ADN maka sei kontinua kompleta pagamentu ba kompañia”, realsa.
Jornalista: Tomé Amado
Editora: Maria Auxiliadora
