Komunidade Musulmanu husu Xanana Gusmão lori dezenvolvimentu hakbseik ba povu
DILI, 29 junu 2023 (TATOLI)—Prezidente Komunidade Musulmanu iha Timor-Leste, Pascoal Sidik “Lemorai”, hateten se iha IX Governu Konstitusionál ne’e mak lidera hosi Kay Rala Xanana Gusmão, mak nia husu ba líder kárismatiku ne’e atu lori dezenvolvimentu hakbesik ba povu liu-liu povu iha área rurál.
Notísia Relevante: Membru IX Governu tenke prienxe kritériu tolu
“Ami espera katak Kay Rala Xanana Gusmão bele lori nasaun ba futuru ne’ebé di’ak liután no liuliu ba komunidade ne’ebé moris iha área rurál ne’ebé seidauk sente dezenvolvimentu ida-ne’e. Karik, ho lideradu hosi Maun Boot Xanana bele halo dezenvolvimentu ne’ebé ema hotu bele goza moris ne’e ho di’ak liu-liu lori dezenvolvimentu hakbesik ba povu iha área rurál,” nia hateten ba jornalista sira iha Maskita An-nur, Kampung Alor, kinta ne’e.
Maibé, nia hateten, importante mak lideransa nasionál no governante sira agora tenke lolo liman ba malu hodi hamutuk mak iha dezenvolvimentu, nune’e bele lori povu no nasaun ba moris di’ak ne’ebé ho prósperu, unidade no armonia.
Nia dehan, iha IV Governu ne’e Maun Boot Kay Rala Xanana Gusmão mak lidera fiar katak povu iha área rurál sei goza dezenvolvimentu.
“Ami-nia parabéns ba Governu foun ne’e, ita hakat ona pasu rua mak pasu primeiru, ita iha ona Prezidente Repúblika ne’ebé lidera hosi José Ramos Horta, no Governu mak ita sei hein hela. Hein katak, ita-nia Maun Boot Kay Rala Xanana Gusmão mak lidera hodi lori dezenvolvimentu ba povu no rai ida-ne’e,” nia hateten.
Notísia Relevante: PR Horta prefere membru Governu foun ho esperiénsia profisionál
Jornalista : Osória Marques
Editór : Cancio Ximenes
