Empreza Campus hakarak investe ba setór saúde no agrikultura iha Oé-Cusse
OÉ-CUSSE, 07 jullu 2023 (TATOLI) – Empreza internasionál Campus Lda, hakarak kontribui investe ba setór saúde no agrikultura iha Rejiaun Administrativa Espesiál Oé-Cusse Ambeno (RAEOA) ba futuru implementasaun zona komérsiu livre entre Timor-Leste ho Repúblika Indonézia ne’ebé sei implementa iha fronteira RAEOA no Nusa Tenggara Timur (NTT).
Notísia relevante: PR Horta-Governadór NTT diskute projetu estratéjiku iha fronteira
Hafoin remata enkontru kortejia ho Autoridade RAEOA, Konsellu Investimentu empreza internasionál Campus, Ersiu Campus, informa, empreza mai vizita Oé-Cusse tanba nu’udar rejiaun espesiál ida iha nasaun Timor-Leste, nune’e presiza ema hotu nia partisipasaun hodi kontribui ba prosesu dezenvolvimentu.
“Ami mai Oé-Cusse, hanesan empreza internasionál prioridade ida maka hakarak kontribui iha dezenvolvimentu, hakarak kontribui iha Oé-Cusse, primeiru ba setór agrikultura, no saúde liuliu haree ba hospitál, tanba Timor-Leste ho Indonézia konkorda ona atu implementa zona komérsiu livre iha Oé-Cusse, sei iha oportunidade ita bele dezenvolve, tanba empreza hakarak investe iha Oé-Cusse ba períodu tinan lima, nune’e ba futuru dezenvolvimentu bele la’o avansadu hanesan nasaun sira seluk,” Ersiu Campus, ba jornalista sira iha edifisíu ZEESM Oé-Cusse, sesta ne’e.
Setór privadu ne’e, konsidera akordu zona komérsiu livre sei benefísia ba povu Timor-Leste, espesialmente iha Oé-Cusse, tanba sei iha konetividade ba setór hotu inklui kontribui mós ba reseita Estadu
“Tan ne’e, ohin ami mai hasoru autoridade hanesan preparasaun ba futuru, ami hakarak partisipa mós iha implementasaun zona komérsiu livre ne’e,” nia orgullu.
Prezidente Autoridade RAEOA, Arsénio Paixão Bano, orgullu maske Governu Sentrál entre Timor-Leste ho Indonézia sei deskuti hela ba preparasaun ba implementasaun, maibé setór privadu sira hahú preparadu.
“Ha’u hanoin, sorumutu ohin ne’e importánte ba ita iha Oé-Cusse, kona-bá oinsá ita-nia preparasaun, ita hatene, akordu ne’e selebra ona, agora sei deskuti hela tékniku atu prepara implementa, ha’u kontente kuandu iha empreza balu hakarak partisipa iha futuru implementasaun zona komérsiu livre ne’e,” nia katak.
Notísia relevante: Zona komérsiu livre bele haforsa Timor-Leste nia estratéjia adere ba ASEAN
Jornalista: Abílio Elo Nini
Editór: Evaristo Soares Martins
