MAP oferese ekipamentu ba grupu 17 iha Naimeko dezenvolve programa HAPAS
OÉ-CUSSE, 07 jullu 2023 (TATOLI) – Grupu komunidade 17 iha suku Naimeko, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), simu ekipamentu post kolleta hosi Diresaun Rejionál Agrikultura hodi implementa programa Hasa’e Produtividade Agrikultura Sustentável (HAPAS) iha Oé-Cusse.
Sekretáriu Rejionál ba Asuntu Agrikultura, José Eta, informa, apoia ekipamentu ne’e prioridade ba post kolleta hanesan mákina multi-funsaun unidade 51 no bidon plástiku hamutuk unidade 481, hodi oferese ba grupu 17 envolve membru grupu 481 mai hosi aldeia haat; Teina’e, Noque, Bonemese no Oélulan iha suku Naimeko.
Notísia relevante: Grupu agrikultór 71 implementa projetu HAPAS iha Oé-Cusse
José Eta, esplika, fundu ba ekipamentu post kolleta hirak-ne’e hetan apoia hosi Banku Mundiál liuhosi kolaborasaun ho Ministériu Agrikultura no Peska (MAP) atu tulun grupu komunidade sira hodi dezenvolve di’ak liután implementasaun HAPAS.
“Ekipamentu sira-ne’e hanesan mákina dulas hare no bele mós dulas batar inklui kafé, tanba durante ne’e grupu sira antes ne’e ona apoia fundu hosi ministériu liuhosi programa HAPAS, entaun ita kontinua apoia tán fasilidade atu fasilira sira-nia atividade grupu, tanba maioria komunidade sira halo atividade pekuária, hakiak animál, inklui to’os no natar,” José Eta relata iha Oé-Cusse, sesta ne’e.
Tuir nia, distribuisaun ne’e sei kontinua ba suku seluk tanba iha RAEOA suku neen (6) maka sai alvu ba projetu ne’e, hanesan sub-rejiaun Pante Makasar iha suku Naimeko, sub-rejiaun Oésilo iha suku Bobometo, Usitas’e no Usitaqueno, iha sub-rejiaun Pássabe, suku Malelat no iha sub-rejiaun Nítibe iha suku Ban-Afi.
Ho dadus ein-jerál ba períodu tinan ne’e, iha Oé-Cusse totál benefisiáriu hamutuk 1.010, halo agrupamentu ba grupu 30 kada grupu envolve ema nain-40 maka partisipa direita iha programa HAPAS ne’e.
Nune’e mós fundu ne’ebé maka apoia iha etapa dahuluk iha 2023 ne’e hamutuk $160,957.50, maioria komunidade sira halo atividade pekuária, hakiak animál halo to’os no natar.
Notísia relevante: RAEOA-MAP oferese fundu rihun $43-resin ba grupu 10 implementa projetu HAPAS
Entretantu, iha 16 novembru 2016, Governu Timor-Leste liuhosi Ministériu Agrikultura no Peska (MAP) selebra akordu ida ho Banku Mundiál hosi Nasaum Unida kona-bá implementasaun projetu Hasa’e Produtividade Agrikultura Sustentavél (HAPAS) iha Timor-Leste.
Projetu ne’e Ministériu Agrikultura no Peska (MAP) ho Banku Mundiál, hahú halo lansamentu iha 29 setembru 2017, munisípiu hitu (7) maka sai alvu iha implementasaun faze dahuluk, hanesan basia idrográfika Be-Lulik, realiza iha munisípiu Ainaro no Covalima, basia idrográfika Loes, realiza iha munisípiu Ermera no Bobonaro, basia idrográfika Raumoco, realiza iha munisípiu Lautem, no basia idrográfika Tono, realiza iha Rejiaun Administrativa Espesiál Oé-Cusse Ambeno (RAEOA).
Projetu ne’e implementa hosi Ministériu Agrikultura no Peska (MAP) hetan finansiamentu fundu hosi Programa Seguransa Ai-haan no Agrikultura ka Global Agrikultura and Food Security Programe (GAFSP) ho montante millaun $21. Ne’ebé ezekuta mai hosi parseiriu sira iha Banku Mundiál nian, hanesan Organizasaun Sosiedade Sivíl sira, no Organizasaun Nasaun Unida nian ba Ai-haan no Agrikultura (FAO), ho durasaun tinan lima, hahú 2017 to’o 2022
Objetivu hosi projetu ne’e, atu hadi’a produtividade agrikultór ki’ik-sira, no fó tulun atu fa’an produtu sira-ne’ebé grupu agrikultór sira prodús, liuhosi planu dezenvolvimentu nian, hanesan atividade pekuária no veternária, ortikultura no indústria inovativu, ida-ne’ebé atu ezekuta iha zona munisípiu 7, Lautem, Ainaro, Covalima, Liquiçá, Ermera, Bobonaro no RAEOA.
Notísia relevante: Hasa’e produsaun no dezenvolve ortikultura sai prioridade projetu HAPAS iha Naimeko
Jornalista: Abílio Elo Nini
Editór: Evaristo Soares Martins
