CNE prosesa hela subvensaun ba partidu polítiku sira
DILI, 11 jullu 2023 (TATOLI)–Vise Prezidente Komisaun Nasionál Eleisaun (CNE), Domingos Barreto, hateten CNE sei halo preparasaun no prosesa hela subvensaun ba partidu polítiku sira-ne’ebé konkorre iha eleisaun parlamentár 2023.
Notísia Relevante: Partidu Polítiku la-liu barreira sei hetan direitu ba subsídiu $4
“Prepara pagamentu subvensaun ba partidu polítiku nian sei iha prosesu nia-laran. Ami CNE prepara dokumentu kada partidu polítika nian no hein haruka ba finansa nasionál no finansa nasionál mak halo prosesu pagamentu, ami só prepara de’it dokumentu,” Domingos Barreto hateten ba Agência Tatoli, iha nia kna’ar fatin, Colmera, tersa ne’e.
Kona-ba bainhira mak submete, nia dehan, seidauk iha serteza tanba sei haree dokumentu tanba partidu barak, nune’e presiza tempu hafoin bele konklui no entrega ba finansa nasionál.
Entretantu, Prezidente Movimentu Libertasaun Povu Maubere, Reis Cadalac, hateten MLPM hein de’it hosi CNE tanba ida-ne’e CNE nia kompeténsia.
“Ami seidauk simu informasaun hosi CNE bainhira mak atu simu subvensaun ne’e, maibé loloos ne’e formasaun Governu ona ne’e, ita bele simu ona osan $4 ne’e, tanba ne’e ita-nia direitu partidu nian. Ami hein de’it,” nia dehan,
Partidu hirak ne’ebé atu hetan subvensaun mak partidu hamutuk 17 ne’ebé uluk konkorre iha eleisaun Parlamentár 2023 ne’ebé akontese iga 21 maiu 2023. Partidu 17 ne’ebé kompete eleisaun parlementár 2023 hanesan Partidu Dezenvolvimentu Nasional (PDN) hetan votu 597 (0.1%), Partidu Libertasaun Povu Aileba (PLPA) hetan votu 3.272 (0.5%). Partidu Libertasaun Popular (PLP) hetan votu 40.720 (5.9%), Partidu Demokratiku (PD) hetan votu 64.517 (9.3%), Partidu Kmanek Haburas Unidade Nasional Timor Oan (KHUNTO) hetan votu 52.031 (7.5%).
Partidu Os Verdes de Timor (PVT) hetan votu 25.106 (3.6%), Partidu União Demoratiku Timorense (UDT) hetan votu 1.256 (0.2 %), Partidu Unidade Dezemvovimentu Demokratiku (PUDD) hetan votu 21.647 (3.1%), Partidu Republikanu (PR) hetan votu 1.558 (0.2%), Partidu Unidade Nasionál Demokratiku Rezisténsia Timorense (UNDERTIM) 023 (0.1%), Partidu Fretilin hetan votu 178338 (25,8%), Partidu Congresso Nacional Reconstrução Timorense (CNRT) hetan votu 288 289 (41.6%).
Partidu Centro Acçao Social Demokrata (CASDT) hetan votu 170 (0.5%), Partidu Movimentu Libertasaun Povu Maubere (MLPM) hetan votu 642 (0,1%), Partidu Socialista Timorense (PST) hetan votu 2 415 (0.3%), Partidu Demokratiku Cristão (PDC) hetan votu 1.262 (0.2%) no Partidu Asosiação Populár Monarquia de Timor (APMT) hetan votu 678 (1.0%).
Jornalista : Osória Marques
Editór : Cancio Ximenes
