Manutensaun ba jardin Colmera atinje ona 70%
DILI, 11 jullu 2023 (TATOLI)—Diretór Kompañia Carinho Unipessoal. Lda, Luis José Oliveira Soares, hateten manutensaun ba jardin Colmera iha sede Partidu Demokrátiku (PD) nia oin ne’e atinje ona 70%.
Notísia Relevante: MTCI mak iha kompeténsia halo manutensaun ba jardín
“Ita halo manutensaun ba jardin Colmera ne’e atinje ona 70%. Hosu pursentu ne’e ami uza aliserse kee rai hosi metru 300 hanesan ne’e, inklui ho nia sinta no mós tau batako no sa’e ba metru ida, ita mós tau ona nia airin hamutuk 80. Ida-ne’e mak ita bele dehan 70%,” nia hateten ba Agência Tatoli, iha jardin Colmera, segunda ne’e.
Responsável ne’e hatutan, nune’e hela 30% atu finaliza manutensaun ba jardin refere atu konklui ona.
“Hela 30% atu konklui no agora ita hein de’it tau fatuk naturál (batu alam) ne’ebé ami kalkulu ba sentímu 30 entaun hosi ne’e ami kalkulu katak semana rua ka tolu bele finaliza ona obra,” nia hateten.
Nia hateten, tuir kontratu ne’ebé iha katak halo manutensaun durante fulan tolu hahú hosi 11 abríl to’o 11 fulan-jullu 2023 maibé la realiza.
“Implementasaun iha terrenu ne’e ami hetan difikuldade hanesan problema bee ho eletrisidade, bainhira ami atu hahú nia prosesu mak bee no ahi laiha, ne’e problema boot ba ami. Entaun, ami labele hahú tuir kontratu ne’ebé iha no ami halo fali eproximasaun ho EDTL hodi reativa fali ahi,” nia dehan.
To’o agora bee laiha maibé atu prosesu manutensaun la’o ho di’ak no susesu mak sosa bee hosi kompañia sira.
“Buat rua ne’e mak sai impaktu boot mai ami atu hotu manutensaun, ho bee no ahi laiha, ami buka alternativu mak tenke sosa bee, hodi asegura prosesu implementasaun manutensaun ne’e,” nia dehan.
Osan ne’ebé aloka ba manutensaun ba jardin Colmera nian hamutuk $66.200.65, ho nia traballadór hamutuk 20-resin, ho tipu hitu (7) mak ba kadeira nian, ahi-oan, solar panel, dalan ketapa iha jardin laran, moru nian, ho seluk tan.
Prezidente Autoridade Munisipiu Dili, Guilhermina Filomena Saldanha, hateten Jardin lima (5) iha kapitál Dili hanesan Jardin 12 de Novembro, jardin 05 de Maio, Jardin Largo de Lecidere , Jardin Colmera ida iha sede Partidu Demokrátiku no Jardin GMN oin ne’e hahú halo manutensaun ona.
“Prosesu manutensaun la’o ona besik fulan ida ona. No, tanba durante ne’e, ita Autoridade Munisípiu Dili (AMD) mak kontrola jardin lima ne’e de’it,” nia dehan.
Hosi manutensaun ne’e, nia dehan, ninia orsamentu la hanesan tanba iha jardin balun ho orsamentu $75.000-resin no iha jardin seluk fali iha orsamentu $80.000-resin maibé ida ho orsamentu boot mak Jardin Largo de Lecidere nian.
Notísia Relevante: AMD sei haruka tékniku jardinazen-jestaun semitériu ba Portugál
Jornalista : Osória Marques
Editór : Cancio Ximenes
