Carinho halo manutensaun ba jardin Colmera bazeia ba dezeñu enjiñeiru AMD
DILI, 12 jullu 2023 (TATOLI)—Diretór Kompañia Carinho Unipessoal Lda, Luis José Oliveira Soares, hateten kompañia halo manutensaun ba jardin Colmera ne’e bazeia ba dezeñu Planta no Kadernu Enkargu (BoQ)ka ne’ebé enjiñeiru Autoridade Munisípiu Dili (AMD) nian.
Notísia Relevante: Manutensaun ba jardin Colmera atinje ona 70%
“Ami nu’udar implementadór la’o tuir de’it dezeñu ne’ebé enjiñeiru Autoridade Munisípiu Dili (AMP) nian prepara. Ami labele halai sees hosi dezeñu ne’ebé fó ami ne’e,” nia hateten ba Agência Tatoli, iha jardin Colmera, kuarta ne’e.
Nia dehan, iha komunidade balun gosta no balun la gosta, ne’e buat normál hela, maibé ida-ne’e sei la hamate kompañia Carinho Unipesoál, Lda, nia espíritu no vontade ne’ebé hakarak kontribui mós ba dezenvolvimentu iha rai-laran.
“Tuir ha’u-nia hanoin ne’e katak hosi dezeñ hateten dahuluk atu asegura materiál ne’ebé iha jardin laran, ne’ebé ita instala ona hanesan iluminasaun (lampu) iha jardin, inklui proteje animál atu labele tama ba jardin hodi estraga ai-funan, duut oan sira, ai-horis oioin ne’ebé iha laran, tuir mai moru mós sei proteje labarik sira mós,” nia hateten.
Nia hateten, moru ne’e la aas liu, nia iha metru ida-ne’ebé bele fó protesaun ba sásan sira-ne’ebé instala iha laran.
“Tanba ne’e, ha’u hakarak atu dehan de’it katak ami prontu ezekuta tuir regra no prosedimentu ne’ebé munisípiu Dili iha. Ami sei la aumenta no la hamenus buat balun. Maibé dala ida tan, hakarak informa ba públiku katak kapitál tenke sai sidade matak, furak no fresku,” nia hateten.
Jornalista : Osória Marques
Editór : Cancio Ximenes
