Edifísiu STAE Manatuto-Covalima-Viquque kompleta ho asesibilidade ba EhD
DILI, 12 jullu 2023 (TATOLI)—Governu liuhosi Sektretariadu Tékniku Administrasaun Eleitorál (STAE), tuir planu sei inaugurá edifísiu foun STAE nian ne’ebé konstrui iha Manatuto, Covalima no Viqueque, ho serimónia inaugurasaun simbolikamente ne’ebé sei hala‘o iha Manatuto, kinta (13 jullu) aban.
Notísia Relevante: Kompaña Riri konstrui edifísiu STAE Covalima finaliza ona
Diretór Jerál Sektretariadu Tékniku Administrasaun Eleitorál (STAE), Acilino Manuel Branco, hateten, edifísiu STAE iha munisípiu Manatuto, Covalima no Viqueque ne’ebé atu inaugural ne’e kompleta ho asesibilidade infraestrutura hanesan rampa ba Ema ho Defisiénsia (EhD) sira.
“Hahú aban, ita inagura edifísiu tolu ne’e, halo esforsu ne’ebé boot liuhosi Governu ho parseiru halo no ohin loron bele finaliza no inagura. Edifísiu ne’e konstrui kompleta ho nia fasilidade ho mós nia espasu ne’ebé bele garante di’ak liután inkluzividade, tanba iha mós rampa ba ema ho defisiénsia sira,” Acilino Manuel Branco hateten ba Agência Tatoli iha nia kna’ar fatin, Caicoli, kuarta ne’e.
Acilino hatutan katak hahú ho edifísiu foun tolu hosi munisípiu refere STAE hahú instala ka tau rampa nune’e bele atende ba EhD sira.
“Buka oinsá atu kontinua asegura fasilidade ho di’ak. Liuliu ho edifísiu foun ne’ebé iha, tenke asegura di’ak liután, no responsabilidade servisu sira-ne’ebé mak mais adequada, no tenke presta servisu no fó atendementu públiku ne’ebé di’ak nune’e garante kualidade ne’ebé uza tempu naruk. No mós tenke kuidadu bee ne’ebé monta iha edifísiu no eletrisidade sira inklui mobiliáriu iha ne’ebá,” nia hateten.
Tuir planu, nia dehan, aban Ministru Administrasaun Estatál, Tomás Cabral, mak sei inaugura simbolikamente iha Manatuto de’it, tanba STAE presiza iha edifísiu ne’ebé di’ak nune’e bele asegura materiál eleisaun nian no bele fó atendimentu ba públiku sira.
“Tanba, edifísiu iha munisípiu tolu ne’e la admite ona atu uza. No mós ita-nia edifísiu iha Covalima, mezmu ho espasu ne’ebé luan, maibé edifísiu ne’ebé daudaun utiliza ne’e husik hela hosi ita-nia maluk Nasaun Unida ne’ebé mai halo servisu no kondisaun mós la admite ona hodi halo servisu, entaun ita tenke halo konstrusaun foun,” nia dehan.
Kona-ba edifísu STAE Viqueque nian, nia dehan, durante ne’e funsionáriu STAE okupa hela Administrasaun munisípiu Viqueque nian no haree katak espasu ne’e la koresponde ona natureza servisu STAE nian, entaun STAE propoin liuhosi apoiu UNDP nian hodi konstrui edifísiu refere.
Edifísiu STAE munisípiu Manatuto, Covalima no Viqueque ne’e finansia hosi UNDP no hetan tulun hosi Governu Japaun, no akordu akontese tanba VIII Governu KOnstitusionál halo parseria servisu ho UNDP.
Nune’e, iha tinan 2022 ho 2023 nian ne’e sUNDP apoiu Timor-Leste iha infraestrutura nian mak halo konstrusaun ba edifísiu STAE nian iha munisípiu tolu no edifísiu ne’e 100% konstruidu no aban sei hahú halo inaugurasaun.
Jornalista : Osória Marques
Editór : Cancio Ximenes
