DILI, 12 jullu 2023 (TATOLI) – Ministériu Edukasaun no Programa Nasaun Unida ba Dezenvolvimentu (PNUD) sei organiza, iha tempu ne’ebé seidauk determina, kompetisaun kona-ba Siénsia, Teknolojia, Enjeñaria no Matemátika (STEM, sigla inglés) ba estudante husi Eskola Sekundária Tékniku-Vokasionál no Eskola Sekundária hodi buka rekursu umanu potensiál iha futuru. Eventu ne’e hatuur ona iha programa ida hanaran Solve for Tomorrow (SSFT).
Ministra Edukasaun, Dulce de Jesus, konsidera programa ne’e sei tulun estudante sira atu iha koñesimentu kle’an kona-ba inovasaun teknolojia iha parte siénsia, teknolojia, enjeñaria no matemátika.
Governante ne’e esplika katak objetivu husi eventu ida ne’e maka oinsá atu lori modernizasaun ba eskola tékniku-vokasionál sira atu alunu sira labele aprende de’it teoria, maibé sira bele tau mós prioridade ba atividade pratika sira. Liuhusi kooperasaun entre PNUD no ME ne’e bele halo planu ida di’ak liután atu realiza kompetisaun ne’e ba estudante sira.
“Ita agradese tebes tanba sei iha apoiu ba eventu ne’e. Kooperasaun ME nian sei halo preparasaun ida di’ak liután, nune’e ita bele realiza kompetisaun internasionál ida hodi sukat kapasidade estudante sira-nian. Programa ne’e rasik sei lori benefísiu ba alunu sira hodi kria buat foun ruma ne’ebé sei hetan avaliasaun husi avaliadór internasionál sira”, dehan Dulce de Jesus afirma iha Vila Verde.
Husi buat foun ne’ebé maka estudante sira kria, sei aprezenta iha kompetisaun ne’e, bainhira SSFT haree katak di’ak, sei foti produtu sira ne’e.
Xefe ekipa PNUD, Jorge Maria Martins, haktuir katak kompetisaun ne’e haree liu bá STEM tanba dalaruma ema dehan eskola de’it maibé laiha pratika, entaun PNUD tenta realiza kompetisaun ida ne’e liuhusi atividade kriativa no inovadora husi estudante sira-nian atubele prepara sira koñese liután siénsia ho di’ak.
“Planu atu realiza kompetisaun ne’e tanba ita hakarak atu hatene kriatividade saida maka estudante sira iha no ho programa hanesan ne’e maka ita bele hetan rekursu umanu ida ho kualidade husi estudante sira”, afirma.
Ba realizasaun programa ne’e maka PNUD hasoru malu ho Ministra Edukasaun hodi halo planu ruma ba futuru oinsá mak bele ajuda estudante sira iha eskola sekundária no tékniku-vokasionál bele halo inovasaun ruma iha eventu refere.
Preparasaun ne’ebé PNUD halo maka kria ona mapeamentu ba eskola sira iha munisipiu lima no haat maka tama ona. Ida ne’ebé mak konfirmadu atu partisipa iha kompeteisaun mak eskola sira iha Rejiaun Administrativu Espesiál Oé-Cusse Ambeno.
Jornalista: Tomé Amado
Editora: Maria Auxiliadora
