DILI, 14 jullu 2023 (TATOLI) – Estudante na’in-90 husi Departamentu Enjeñaria no Indústria, Fakuldade Enjeñaria, Universidade Dili (UNDIL) halibur lixu iha kapitál hodi halo resikla sai sai produtu útil hanesan pavimentu.
Dosente Fakuldade Enjeñaria, Paulino Gamboa, haktuir katak resiklajen ne’ebé estudante halo ne’e nu’udar asaun ida atu reutiliza sasán sira ne’ebé maka la uza ona hanesan masa mamuk, plástiku, kaixa aat, nu’u kulit, besi-aat no kalén sai sasán ne’ebé bele fa’an iha merkadu.
“Atividade resiklajen ne’e estudante sira halo tanba iha dixiplina ida kona-bá jestaun ambientál, oinsá ita bele salva ambiente husi risku dezastre naturál no oinsá mak bele kuidadu biodiversidade sira ne’ebé maka moris iha tasi”, Paulino Gamboa informa iha kampus UNDIL, Mascarenhas.
Lixu ne’ebé mak estudante sira rekolla iha fatin públiku ne’e transforma tiha sai sasán ne’ebé serve atu uza no bele fa’an iha merkadu mak hanesan pavimentu, fugaun no artezanatu.
Atividade ida ne’e mós atu tulun estudante sira hodi prepara sira-nia aan bá futuru karik hakarak loke negósiu ruma, sira hatene ona atu halo buat ruma ho sasán la uza sira ne’e ba fali buat ne’ebé bele uza.
Tuir Paulino, prosesu atu halo pavimentu ne’e la kleur, tanba ekipamentu sira ne’e sei limitadu entaun halo tuir nesesidade ne’ebé iha no ida ne’e mós depende ba masa ka plástiku ne’ebé maka estudante sira rekolla.
“Pavimentu ne’e presiza masa barak, ida de’it bele han masa ka plástiku hamutuk 50. Tanba ne’e maka fakuldade orienta ona estudante sira atu husu ba komunidade sira karik iha plástiku ka masa mamuk aat sira ne’ebé la uza ona bele apoiu mai UNDIL, nune’e estudante sira bele halo prátika ba resiklajen”, katak.
Atividade ne’e foin maka hahú iha semana kotuk no pavimentu ne’ebé maka estudante sira prodús ne’e seidauk barak, maibé iha ona ema balun maka komesa hameno atu nahe iha sira-nian uma, nune’e alunu sira sei aumenta nia kuantidade.
Estudante Marcelina Bone Fala haktuir katak atividade ne’ebé sira halo daudaun ne’e mai husi siénsia ne’ebé sira hetan iha aula tanba ne’e sira halo fali pratika atu hatene ninia rezultadu.
“Ami fiar katak ho atividade rekolla lixu sira ne’ebé naklekar iha kapitál Dili ne’e hanesan asaun ida atu kontribui ba kuidadu ambiente no evita inundasaun no proteje ita nia biodiversidade, liuliu ikan sira ne’ebé mak moris iha tasi laran”, dehan.
Jornalista: Tomé Amado
Editora: Maria Auxiliadora
