iklan

EDUKASAUN

Formasaun espirituál umana “Christus Vivit” ba joven parokia Aimutin finaliza ona

Formasaun espirituál umana “Christus Vivit” ba joven parokia Aimutin finaliza ona

Joven parokia São José Aimutin Aimutin hamutuk 60 tuir Formasaun Espirituál Umana (FEH, sigila portugés) ho matadalan Christus Vivit hanesan karta espesiál hosi Santo Padre Francisco I ne’e ramata ona, segunda (17 jullu 2023). Imajen Tatoli/Cidalia Fátima.

DILI, 17 jullu 2023 (TATOLI)—Formasaun Espirituál Umana (FEH, sigila portugés) ho matadalan Christus Vivit hanesan karta espesiál hosi Santo Padre Francisco I ba joven 60 hosi Paroquia São José Aimutin finaliza ona.

Reprezentante Parokia São José Aimutin, Helio Castro Alves, CMF, hateten FEH Christus Vivit ne’e inisiativa hosi AMC (Alin Maun Claretiano) Parokia Aimutin servisu hamutuk ho Komisaun Nasionál Juventude Katolika Timor-Leste (CNJCTL) no Komisaun Juventude Katolika Arkidioseze Dili (COJUCAD).

“Ho servisu hamutuk ida-ne’e mak hanesan misaun ba ita hodi lori joven futuru igreja nian. Ba alin joven sira simu ona formasaun ida-ne’e no koko para atu bele partilla iha imi-nia moris, familia no kapela sira imi besik ba,” Pe. Helio Castro Alves, hateten ba Agência Tatoli, segunda ne’e.

Nia hateten, FEH Christus Vivit iha Parokia Aimutin realiza durante loron 11 ne’ebé hahu hosi 11 juñu to’o 16 jullu iha kada loron sábadu no domingu.

Antes ne’e iha joven kuaze 80 ne’ebé hili hosi kada kapela iha Parokia Aimutin maibé husi numeru refere iha formandu 60 de’it mak konsege partisipa to’o ramata.

Padre Helio mós hato’o agradesimentu ba ekipa hosi CNJCTL fasilita ona oradór diferensa ba formasaun hahú hosi loron dahuluk introdusaun kona-ba Christus Vivit to’o finalizasaun kapitulu sia nian

Formandu Agueda Perreira hosi Kapela Fomentu I agradese ba formasaun ne’ebé konsege loke hanoin no bele kompreende loloos oinsá atu bele sai joven ne’ebé hala’o misaun ba foinsa’e sira seluk.

“Christus Vivit ne’e diak tebes tanba sai hanesan Biblia ba foinsa’e sira-nian, tanba hanorin atu sai foinsa’e ne’ebe adapta aan ho mundu agora, relasaun ho Maromak, Joven Missionáriu, Pastorál Juvenil no ikus liu atu ita koñese loloos ita-nia aan,” Agueda Perreira hateten.

Diretór Ezekutivu COJUCAD, Padre Cirilio dos Santos Maia, hateten Christus Vivit mak hanesan karta espesiál Santo Padre Francisco I ne’ebé fó sai iha 25 marsu 2019 no sai Biblia ba Joven sira hodi fó hanoin fila-fali kona-ba konviksaun fiar nian no enkoraja foinsa’e buras iha santidade no kompromisu ba vokasaun.

“Apresia tebes ho Programa Christus Vivit, tuir Amo Cardeal nia liafuan hateten Christus Vivit hanesan Biblia ba Foinsa’e sira. Ha’u hein katak Christus Vivit sai hanesan imi-nia dalan di’ak ida hosi ne’e iha resposta mak Nia (Kristu) hakarak ó moris,” Padre Cirilio hateten.

Padre Cirilio esplika, ho entuziasmu hodi joven katolika sira, Arkidioseze Dili iha ona inisiativa hodi organiza hikas atividade FEH Christus Vivit iha setemberu 2023.

Tuir dadus hosi COJUCAD daudauk ne’e, parokia hamutuk 34 mak hola parte iha Arkidioseze metropolitan Dili.

Jornalista : Cidalia Fátima

Editór       : Cancio Ximenes

iklan
iklan

Leave a Reply

iklan
error: Content is protected !!