LAUTEM, 23 jullu 2023 (TATOLI) – Ekipa Taskforce Kombate Tuberkoluze Munisípiu Lautem, lideradu husi Administradór Munisípiu Lautem, Domingos Sávio kompromete sei serbisu maka’as ho parte relevante atu kombate TB hodi atinji mehi ba eliminasaun TB iha 2025.
Kompromísiu ne’e hato’o iha seremónia estabelesimentu Ekipa Taskforce Kombate Tuberkoluze Munisípiu Lautem, sábadu, foin lalais ne’e.
Ekipa refere kompostu husi Adminisitradór Munisípiu Lautem, Domingos Sávio nu’udar Prezidente, no Diretór Saúde Munisípiu Lautem, Anastacio da Cruz nu’udar Vise-prezidente. Ekipa refere envolve mós Administradór Postu ne’en iha Lautem, Xefe Sentru Saúde, Koordenadór Klínika, Xefe Vijilánsia Servisu Saúde, Diretór Edukasaun, Diretór Ministériu Solidaridade no Inkluzaun, Padre Parokia, Pastor Igreja Protestante, Líder Relijiozu Muzulmanu, Xefe Suku 34, Komandante PNTL, no Veteranu Lautem tomak.
Domingos hateten, TB nu’udar moras endemiku ne’ebé mak fasil hada’et hodi hamate ema barak iha mundu, inklui Timor-Leste.
Atu kombate TB iha Timor-Leste, Ministériu Saúde define polítika no estratejia ne’ebé kontempla iha Planu Estratéjiku Dezenvolvimentu Nasionál 2011-2030 hodi koordena no serbisu hamutuk hodi atinji mehi elimina TB iha Timor-Leste.
Atu atinji mehi refere, VIII Governu, lideradu husi Eis-Primeiru Ministru Taur Matan Ruak, iha fulan setembru 2021, hato’o komprimisiu atu elimina iha Timor-Leste, iha 2025.
“Hanesan Prezidente Munisípiu Lautem, asume knaar nu’udar Prezidente ba Ekipa Taskforce ida ne’e iha papél no komitmentu atu serbisu hamutuk ho parte relevante sira hanesan komandu PNTL, Administradór Postu sira, veteranu, diretór interministeriál, igreja, xefe suku no espesialmente povu Lautem hodi kombate TB. Ohin, ha’u deklara katak iha 2025, ita tenke elimina TB iha Lautem,” Domingos hato’o kompromisiu refere, iha ámbitu komemorasaun loron nasionál saúde, iha Munisipiu Lautem, sábadu ne’e.
Lori ekipa taskforce nia naran, autoridade másima munisípiu Lautem ne’e husu ba parte hotu atu fo liman ba malu hodi kontribui ba esforsu kombate TB iha munisípiu Lautem.
“Ekipa tasforce ne’e nu’udar forsa kolletivu ida ne’ebé sei hala’o nia knaar ho matenek, responsabilidade, integridade, no dedikasaun tomak hodi kontribui ba mehi eliminasaun TB iha Timor-Leste, partikularmente iha munisipiu Lautem,” nia konklui.
Iha biban ne’e, Ministra Saúde, Élia dos Reis Amaral hato’o katak Governu Timor-Leste, liuhusi Ministériu Saúde iha kompromisu boot atu elimina TB iha nasaun ne’e.
“TB moras infesioza ne’ebé afeta liu ema ho idade produtivu hodi prezidika dezenvolvimentu ekonomia nasaun. Ida ne’e sei fo impaktu ba prospieridade Timor-Leste iha futuru,” Élia esplika.
Hodi kombate TB iha Timor-Leste, Ministériu Saúde prepara ona ekipamentu adekuadu sira hodi halo teste no tratamentu ba moras TB: “Sputum Microscopy disponível ona iha Sentru Saúde hotu, inklui GeneXpert, makina X-Ray, no AI-Assisted ba detensaun tuberculosis, no seluktan.”
Jornalista: Filomeno Martins
Editór : Rafael Ximenes de A. Belo
