Komunidade Tunubibi reabilita kampu Hul-topol

MALIANA, 24 jullu 2023 (TATOLI)-Liuhosi Programa Mão de Obra Postu Administrativu (PMOPA) faze daruak tinan 2023 ne’e komunidade aldeia Tunubibi, suku Tapo-Memo, postu administrativu Maliana, munisípiu Bobonaro halo reabilitasaun liuliu monta rede halo lutu haleu kampu futeból Hul-topol.

Xefe adeia Tunubibi, Fernando Raul, haktuir atividade fízika ne’e hala’o iha semana kotuk ne’e ho totál traballadór na’in-20 ne’ebé sei servisu rotasaun.

Servisu ne’ebé trabaladór sira halo mak halo lutu asegura kampu refere, fatin ba jogadór, tribun medida 6X4 fatin ba Verry Important Person (VIP) no ofisiál sira.

Notísia relevante: Bobonaro hetan alokasaun rihun $600 implementa PMOPA

“Ita-nia servisu ba obra ida-ne’e komesa loron neen ona, agora to’o ona prosesu halo tribun, iha medida ita bazea ba kampu ne’e, maibé ita fora hosi ida-ne’e, atu asegura kampu ida-ne’e, obra ida-ne’e ami la hetan orsamentu, maibé ami hetan deit materiál hanesan rede, besi baja no simentu,” nia informa ba jornalista sira, iha Tunubibi, segunda ne’e.

Nia konsidera programa PMOPA iha vantajen di’ak no iha benefísia rua, ida ba trabalLadór sira hetan osan no ida seluk bele hadi’ak infraestrutura bázíka iha aldeia ne’e.

“Programa ne’e lais, to’o kedas iha baze, ami-nia komunidade liuliu joventude sira kontente tanba antes ne’e ami halo pedidu ba fatin balun laiha resposta pozitivu, maib PMOPA bainhira ami halo pedidu ba sira responde kedas,” nia katak.

Antes ne’e liuhosi PMOPA aldeia ne’e prioriza halo limpeza jerál no hadi’ak dalan no konstrui valeta metru 100-resin, maibé faze ida-ne’e konsentra fali halo rebilitasaun kampu  nune’e bele prepara kondisaun ba joven sira-ne’ebé hakarak promove sira-nia talentu iha área desportu.

Líder lokál no komunidade sira deside implementa obra ne’e liuhosi PMOPA tanba kampu Hultopol ne’e mós ba futuru bele sai kampu futeból alkternativu ba eventu nasionál sira.

“Ita iha Maliana, kampu boot ida iha rotunda no estádiu Malibaca de’it, restante ne’e ita laiha kampu altertativu, ba faze terseiru tuir mai mós ami sei tau prioridade nafatin hodi kompleta fasilidade sira hanesan halo sintina no sei fura bee,” nia dehan.

Enkuantu tuir planu hafoin finaliza obra ne’e autoridade suku no aldeia sei realiza eventu futeból, maibé sira sei deside taxa ida, entre taxa Maria-Tapo, Fronteira, Liurai, 12 novembru no 28 novembru.

Notísia relevante: PAM Bobonaro husu traballadór PMOPA serbisu ho loloos

Jornalista: Sérgio da Cruz

Editór: Evaristo Soares Martins