Governu TL-Portugál kontinua hametin servisu bilaterál iha seguransa sosiál
DILI, 26 jullu 2023 (TATOLI)—Ministra Solidariedade Sosiál no Inkluzaun (MSSI), Verónica das Dores, hateten Governu Timor-Leste no Portugál kontinua hametin servisu bilaterál iha área seguransa sosiál nian.
Notísia Relevante: Governu Timor-Leste no Portugal asina konvensaun ba Seguransa Sosiál
“Portugal ho Timor-Leste ohin halo sorumutu hodi kontinua halo servisu kooperasaun dezde uluk to’o agora tanba ita nasaun irmaun. Nune’e, kooperasaun ne’e ita ho sira mak liuhosi SEFOPE no apoiu ba seguransa sosiál nian. Ita iha seguransa sosiál ne’ebé hanesan no agora polítika tama ona ein-vigor no ita hein de’it asina nota téknika iha tempu badak nia laran,” Verónica das Dores hateten ba jornalista sira, hafoin hasoru malu ho Ministra Traballu Solidariedade no Seguransa Sosiál Portugál, Ana Mendes Godinho, iha Otél Timor, kuarta ne’e.
Nia hateten, bainhira asina nota téknika ne’e parte rua hahú implementa no bele garante traballadór timoroan ne’ebé ba servisu iha Portugál, no sira-nia emar sira mai servisu iha Timor-Leste.
Ministra Traballu Solidariedade Portugál, Ana Mendes Godinho, hateten iha oportunidade ne’e parte rua ko’alia kona-ba abitasaun seguransa sosiál nian.
“Ohin, ami ko’alia kona-ba kooperasaun entre Portugál ho Timor-Leste ba tinan 2024-2028 nian, kona-ba levantamentu ba projetu hanesan natureza no mós implementasaun seguransa sosiál ne’ebé permite hodi halo interkámbiu ba sidadaun Timor-Leste ne’ebé servisu iha Portugál no sidadaun Portugés ne’ebé servisu mós iha Timor-Leste. Ne’ebé, iha koñesimentu karreira iha abitasaun seguransa sosiál atu garante ba protesaun tempu naruk nian,” nia hateten.
Aleinde ne’e, mai identifika grande projetu prioritáriu sira nune’e bele kontinua halo kooperasaun ne’e, tanba ida-ne’e hanesan parseria virtuál iha nasaun rua ne’e ba pasadu nian, nune’e iha futuru hamutuk sai konstrutivu liután
Jornalista : Osória Marques
Editór : Cancio Ximenes
