Komité 12 Novembru preokupa konstrusaun “Monumentu 12 Novembru” tarde
DILI, 26 jullu 2023 (TATOLI)—Prezidente Komité 12 Novembru, Gregório Saldanha preokupa ho konstrusaun Monumentu 12 Novembru ka Mmemoriál Masakre Santa Cruz ne’ebé ninia prosesu konstrusaun la’o tarde liu.
Notísia Relevante: Konstrusaun Monumentu 12 Novembru tarde tanba fallansu tékniku
Ho kondisaun ida-ne’e, nia husu IX Governu Konstitusionál atu hola medida adekuadu ba kompañia ne’ebé kaer obra ne’e ho lalais no ho kualidade.
“Ami ezije nafatin primeiru obra ne’e tenke halo. Segundu, mak tenke ho kualidade no terseiru mak tenke lalais. Hosi ami ezije to’o harii obra ne’e seidauk hotu. Ami hein Governu foun bele impoin ho nia autoridade para iha Novembru tinan ne’e bele inaugura ona monumentu ne’e,” Gregório Saldanha hateten ba jornalista sira hafoin vizita semitériu Santa Crus, kuarta ne’e.
Hafoin VIII Governu Konstitusionál loke konkursu públiku no Kompañia Bobolait Unipesoál, Lda, mak manan konkorsu refere maibé konstrusaun mak la’o hela ne’e, konstrusaun lori tempu naruk loos no tarde loos.
“Kompañia tenke responsabilidade, ha’u hanoin buat balun laloos, bele pergunta ba kompañia tanba saida. Ami ezije obra ne’e tenke lalais. To’o agora seidauk hotu kleur tebes ona. Bele iha iregularidade ruma, ha’u la aponta iregularidade sira maibé ha’u haree tarde demais,” nia dehan.
Bainhira tarde demais, Governu tenke haree no fó sansaun tuir lei jo regulamentu sira, Governu liuhosi Ministériu Asuntu Kombatente Libertasaun Nasionál (MAKLN) iha autoridade tomak tenke foti medida tuir lei tanba MAKLN mak sai na’in ba projetu refere.
“Na’in ba projetu konstrusaun monumentu Memórial Masakre Santa Cruz ne’e mak MAKLN. Dezde inisiu konstrusaun ne’e, Komité 12 Novembru sempre ezije atu obra ne’e finaliza tuir tempu ne’ebé determina ona, maibé to’o agora seidauk hotu. Hein katak IX Governu konstitusionál bele impoin ho nia autoridade, nune’e iha Novembru tinan ne’e, Monumentu 12 Novembru ne’e bele inaugural ona,” nia rekomenda.
Konstrusaun Monumentu 12 Novembru ka Memoriál Masakre Santa Cruz ne’e ezekuta hosi empreza nasionál Bobolait Unipesoál Lda, ne’ebé ezekuta ho orsamentu valór millaun $1,385.
Jornalista : Osória Marques
Editór : Cancio Ximenes
