COVALIMA 29 jullu 2023 (TATOLI)—Ministériu Saúde liuhosi Institutu Nasionál Saúde Públika Timor-Leste (INSP-TL) fasilita formasaun violénsia bazeia ba jéneru ba profisionál Saúde durante loron lima iha Covalima.
“Ami hala’o formasaun ba profisionál sira hodi responde ba atividade violénsia bazeia ba jéneru ne’ebé liuliu vítima sira mai halo tratamentu iha sentru saúde sira,” Diretora Nasionál Formasaun INSP-TL, Perpetua Ana Mery Estela Laot, hateten ba Agência tatoli iha otél Joyia, Camnasa, sábadu ne’e.
INSP-TL realiza atividade formasaun violénsia bazeia ba Jéneru tanba durante profesionál Saúde sira mak halo tratamentu iha Sentru Saúde no postu saúde sira.
Formasaun ne’e hanesan parte ida atu hasa’e profisionál saúde sira nia koñesimentu no abilidade iha sira-nia servisu fatin.
Antes tuir formasaunm profisionál saúde sira-ne’e hala’o atendimentu maibé sira iha limitasaun kapasidade nune’e ho formasaun ida-ne’e bele ajuda di’ak liután sira iha servisu fatin.
Atividade ida-ne’e realiza hosi institutu Públiku saúde hetan suporta fundu UNFPA.
Durante formasaun, tuir diretora nia observasaun, la’ós foun maibé durante sira atende kazu sira maibé ladún iha sentimentu konfortavel atu bele halo atendimentu.
“Ho formasaun, ha’u hanoin, sira preparadu atu bele halo atendimentu ba sobrevivente sira, nune’e agora sira preparadu ona atu bele halo atendimentu,” nia hateten.
Atuvidade formasaun durante loron lima ne’e, partesipa hosi Xefe Sentru saúde, enfermeiru no parteira sira hosi sentru saúde no postu saúde sira iha Covalima.
Bazeia ba dadus, Governu liuhosi Ministeriu Saúde estabelese ona sentru saúde hitu no postu saúde 24 iha Covalima.
Jornalista : Celestina Teles
Editór : Cancio Ximenes
