Feto tenke kapasita-aan kompete iha eleisaun xefe suku
DILI, 14 agostu 2023 (TATOLI)—Sekretáriu Administradór Munisípiu Manatuto, Eduardo Guterres, hateten feto labele depende liu ba mane maibé tenke kapasita-aan hodi kompete ho mane sira iha eleisaun xefe suku ne’ebé sei akontese iha outubru 2023.
Notísia Relevante: Deputada PD-FRETILIN enkoraja feto partisipa iha eleisaun xefe suku
“Depois ita haree xefe suku feto na’in-tolu nia servisu ne’e, ita haree katak feto mós bele. Tanba ne’e, imi feto keta laran taridu ba ita-boot sira-nia aan rasik. Labele depende demais ba mane sira. Nune’e, ha’u fó korajen nafatin ba imi feto sira katak lalika hamosu dúvida ba imi-nia aan no labele haree liu bá kultura,” Eduardo Guterres hateten ba Agência Tatoli, iha edifísiu edifísu Ministériu Administrasaun Estatál (MAE) Colmera, segunda ne’e.
Xave importante, nia hateten, feto sira tenke kapsita imi-nia aan hodi avansa no kandidata-aan, tanba mundu modernu no nasaun demokrátiku ne’e, ema hotu-hotu iha direitu ne’ebé hanesan hodi la haree ba feto ka mane.
“Imi presiza mak kapasita imi-nia aan de’it no labele tauk hodi kompete ho mane. Ba Manatuto-oan, daudaun ne’e, ita iha feto na’in-tolu ne’ebé lidera ona suku no ida lidera postu administrativu no sai hanesan administradora postu administradora Manatuto Vila,” nia enkoraja feto sira.
Hosi xefe suku feto na’in-tolu ne’e, nia hateten, ida hosi suku Sau, seluk iha suku Manlala no ida tan hosi suku ida iha Manatuto nian.
Entretantu, tuir lei númeru 9/2016 hateten eleisaun suku ne’e realiza hosi lideransa komunitária rasik, tanba eleisaun mós iha nia kompleksidade lubuk ida, entaun órgaun eleitorál tenke fó formasaun katak STAE tenke fó formasaun ba lideransa komunitária hodi sira bele kompreende no oinsá organiza eleisaun ne’e.
“Seluk mak ita apoiu entermu lojistika tanba eleisaun suku ne’e sei iha aldeia 2225, entaun ida – ne’e ita konsidera sentru votasaun. Ne’e, signifika katak lojistika sei boot liu entaun orsamentu mós tenke tuir ne’e inklui rekursu umanu. Maibé, sira-ne’e hotu presiza iha formasaun ba sira. La’ós ida-ne’e de’it, ita mós sei presiza osan ba operasionál hanesan emprime buletin votu. Seluk mak rezultadu eleisaun ne’e sei la lori ba Tribunál, maibé sei junta akta iha suku entaun ita dehan operasionál sei boot,” Diretór Sekretáriadu Tékniku Administrasaun Eleitorál (STAE), Acilino Manuel Branco, hateten.
Antes ne’e, iha OJE 2023 prevee millaun $9 tau iha Dotasaun todo Governo hodi realiza eleisaun suku ba despeza utiliza iha asembleia aldeia no asembleia eleitoral suku nian presiza apoiu hosi órgaun administrasaun eleitoral.
Konforme lei númeru 9/2016 ba eleisaun mandatu membru konsellu suku sira hotu-hotu nian tinan hitu (7) no termina iha fulan outubru tinan2023 ne’e, no tuir lei presiza realiza eleisaun iha aldeia hotu-hotu ba xefe aldeia, delegadu/a sira, presiza mós realiza eleisaun ba xefe suku sira iha territóriu nasionál no mós própriu konsellu suku sira presiza realiza mós eleisaun ba lia-na’in, reprezentante juventude mane no feto.
Jornalista : Osória Marques
Editór : Cancio Ximenes
