Liña internete iha Adminitrasaun Munisipál Bobonaro la funsiona
MALIANA, 14 agostu 2023 (TATOLI) – Liña Internet ne’ebé Ajénsia Teknolojía Imformasaun (TIC-TIMOR), Institutu Públiku instala iha Administrasaun Munisipál Bobonaro la funsiona kuaze fulan tolu ona.
Diretór Finansa Administrasaun Munisípiu Bobonaro, Elizeu Lopes de Araújo, informa problema ne’e akontese iha fulan-abríl ne’e kedas to’o agora.
Notísia relevante: TIC Timor no IPG kolabora hamenus gastu la nesesáriu iha área informátika
“Ha’u hakarak informa katak, Internet ne’ebé durante ne’e fornese hosi TIC la funsiona ho di’ak, tanba ho razaun gangguan sistema iha nasionál,” nia informa ba Tatoli, iha Maliana, segunda ne’e.
Diretór Elizeu dehan, problema refere Sekretáriu Autoridade Munisípiu Bobonaro, João de Fátima do Carmo, hato’o ona karta ba diretór ezekutivu TIC-Timor, Roberto Caetano de Sousa Vicente, atu halo intervensaun maibé to’o agora seidauk iha resposta.
Relasiona ho problema internete ne’e, dadaun ne’e funsionáriu sira atu halo servisu asesu de’it liña internete iha telemovel privadu ho pulsa ne’ebé governu oferese ba halo komunikasaun nian, maibé rede lenta loos.
Diretór ne’e katak, problema ne’e difikulta tebes servisu diresaun munisipál finansa nian,tanba tuir leí obrigatóriu tenke uza internete informátika.
“Dalaruma ami la’o tarde oituan tanba ami konek de’it hotspot ba klolega sira halo CPV ba to’o, entaun internete la’o ladi’ak, tanba hotspot ida ami konek to’o ema na’in-hitu, signifika ninia loading ne’e kleur la halimar, tanba ita uza obrigatóriu tuir dekretu ezekusaun orsamentu, sistema orsamentu hotu-hotu tenke liuhosi Free and Balance,” nia katak.
Relasiona ho asuntu ne’e, Responsável Diresaun Finansa Administrasaun Munisípiu Bobonaro ne’e husu TIC-TIMOR, atu halo normalizasaun ba liña internete ho urjénsia.
“Ita hatene katak besik ona atu taka tinan fiskál, ita preiza tebes liña internete ne’ebé di’ak hodi nune’e ita bele aselera prosesu ezekusaun, liuliu iha tempu badak ita komesa tama ona prosesu pagamentu liuhosi prosesu aprovizionamientu tanba prosesu hotu-hotu remata ona, entaun hein ita atu halo pagamentu, ne’e duni hosi fulan ida-ne’e ita presiza internete ne’ebé lalais,” Elizeu fó hanoin ba TIC Timor.
Notísia relevante: ADN sosializa prosesu pagamentu projetu ba emprezáriu Bobonaro
Jornalista : Sérgio da Cruz
Editór : Evaristo Soares Martins
