Governante bele lori ema apoiu polítiku maibé iha limitasaun
DILI, 15 agostu 2023 (TATOLI)—Prezidente Komisaun Funsaun Públika (KFP), Faustino Cardoso, tuir dekretu-lei 27/2016 kona-ba apoiu polítiku gabinete membru Governu sira-nian fó dalan ba Governante sira bele lori ka nomea ema apoiu polítiku iha gabinete maibé iha limitasaun.
Notísia Relevante: KFP sei re-koloka funsionáriu ANAPMA-ANE, I.P-ANAS, I.P ba instituisaun orijen
“Ita iha dekretu-lei 27/2016 kona-ba apoiu polítiku gabinete membru Governu sira-nian, ne’ebé fó espasu no biban ba membru Governu sira ida-idak hahu kedas hosi Primeiru-Ministru, Vise Primeiru-Ministru, Ministru, Vise Ministru no Sekretáriu Estadu sira ida-idak iha direitu atu bele nomea ema sira-ne’ebé sira sente konfiansa atu fó apoiu polítika iha gabinete sira ida-idak ninian, maibé iha limitasaun,” Prezidente KFP, Faustino Cardoso, hateten ba Ajénsia Tatoli iha Parlamentu Nasionál, tersa ne’e.
Tanba, nia hateten, dekretu-lei ne’e define ba Primeiru-Ministru, Vise Primeiru-Ministru, Ministru, Vise Ministru no Sekretáriu Estadu atu bele lori ema na’in hira.
“Ha’u entende katak, la sala ba Primeiru-Ministru ne’e iha na’in-12 pesoa, Sekretáriu Estadu iha na’in-sia (9) se la sala ha’u la dekor, maibé iha limitasaun ba ida-ne’e,” nia hateten.
Prezidente Komisaun Funsaun Públika ne’e la esplika kona-ba bainhira mak membru Governu lori ema liu tuir dekretu-lei ne’ebé define hodi fó apoiu polítiku iha gabinete.
Jornalista : Nelson de Sousa
Editór : Cancio Ximenes
