Auzénsia PPN iha debate proposta OR 2023 laiha impaktu
DILI, 17 agostu 2023 (TATOLI)—Prezidente Komisaun C trata asuntu Finansa Públika, Deputada Cedelizia dos Santos, hateten auzénsia Prezidente Parlamentu Nasionál (PPN), Maria Fernanda Lay, iha debate proposta lei Orsamentu Retifikativu (OR) 2023 sei laiha impaktu.
“Ha’u hanoin laiha impaktu, tanba ita iha Vise Prezidente PN na’in-rua, segundu no primeiru. Karik, Pezidente mós bele delega ninia podér serbisu ba Vise na’in-rua, entaun bele la’o nafatin,” Prezidente Komisaun ne’e hateten ba jornalista sira iha PN, kinta ne’e.
Tuir kalendáriu ne’ebé iha diskusaun proposta OR ba 2023 iha faze jeneralidade hahu iha loron 21 agostu, no iha 22-23 agostu diskute faze espesialidade, 24 agostu aprovasaun finál global, maibé iha 21 agostu ne’e Prezidente Parlamentu Nasionál ho delegasaun sei dezloka ba rai-li’ur.
Prezidente Parlamentu Nasionál, Maria Fernanda Lay, sei reprezenta Prezidente Repúblika (PR), José Ramos Horta, iha simeira Xefe Estadu Komunidade Nasaun Ko’alia Lian Portugés (CPLP, siglá portugés) ne’ebé sei realiza iha São Tome e Principe iha 27 agostu tinan ne’e.
Vise bankada FRETILIN, Deputadu David Dias Ximenes ‘Mandati’, hateten hanoin PPN ninia haree auzénsia ne’e laiha impaktu iha debate proposta OR ho karáter urjénsia tanba iha Vise Prezidente na’in-rua, ne’ebé sai ida tenke koajuva tarefa ne’ebé Prezidente nian sira.
Jornalista : Nelson de Sousa
Editór : Cancio Ximenes
