iklan

DILI

Marimba fahe esperiénsia ba artista timoroan hetan lukru liuhosi “Youtube no “Spotify”

Marimba fahe esperiénsia ba artista timoroan hetan lukru liuhosi “Youtube no “Spotify”

Embaixadór Projetu Marimba iha Timor-Leste, Denilson Junior. Imajen/Espesiál.

DILI, 22 agostu 2023 (TATOLI)–Embaixadór Projetu Marimba iha Timor-Leste, Denilson Junior, hateten Projetu Marimba hakarak fahe esperiénsia ba artista timoroan hodi hetan lukru hosi nia produsaun múzika liuhosi kanál Youtube no Spotify.

Notísia Relevante: Artista ezije atu aselera divulgasaun Lei Direitu Autór

Tanba, nia dehan, projetu Marimba importánsia iha nasaun ne’e no konsidera hanesan oportunidade boot ida ba artista timoroan sira atu dijitaliza sira-nia servisu no bele promove iha plataforma múzika hodi hetan rendimentu.

“Iha Timor artista barak ne’ebé kanta sira-nia knananuk no públika iha plataforma mídia sosiál sira, maibé sira la hatene oinsá atu uza plataforma dijitál ida atu hetan osan. Ho prezensa projetu Marimba nian sei ajuda sira atu hasa’e sira-nia koñesimentu hodi uza plataforma hanesan Youtube no Spotify hodi hetan lukru,” Denilson Junior hateten jornalista sira iha Sentru Audiovisual Max Stahl iha Timor-Leste (CAMSTL).

Denilson konsidera, projetu ne’e importante tebes, aleinde promove múzika orijinál Timor nian tanba Marimba hanesan projetu ida-ne’ebé foka liu ba diseminasaun múzika no implementasaun empregu ba artista foinsa’e sira iha Pais Afrika haat, ne’ebé ko’alia lian Portugé hanesan Ângola, Guine-Bissau, Mosamque no Timor-Leste.

“Objetivu mak atu promove koñesimentu no apresiasaun kona-ba patrimóniu múzika nasaun partisipante sira-nian, iha aspetu oioin liuliu iha rejistu kampu, dijitalizasaun, promosaun no distribuisaun internasionál sira,” nia dehan.

Koordenadór Jerál SundsGood, Miguel Angelo, hateten atividade implementasaun Projetu Marimba iha Timor-Leste ne’e sei hala’o iha fulan-setembru.

“Marimba nu’udar atividade importante ida tanba envolve prémiu finanseiru ida ba artista sira-ne’ebé manán atu apoia iha dezenvolvimentu sira-nia karreira, tanba objetivu ida hosi projetu ne’e mak atu promove artista sira atu kria servisu,” nia hateten.

Aleinde ne’e, nia dehan, iha mós atividade seluk hosi projetu ne’e mak atu fó formasaun ba artista timoroan sira kona-ba múzika, dezenvolvimentu karreira no dijitalizasaun múzika nian, ne’ebé tuir kalendáriu sei hahú iha CAMSTL fulan oin mai.

Orsamentu ba projetu ne’e, tinan tolu iha nasaun haat iha atividade oioin no finansia hosi Programa Uniaun Europeia no Camoes-Instituisaun Kooperasaun no Lian, ho euro rihun 950 no iha euro rihun 80 hosi produtór Portugés, SundsGood.

Fundu hirak-ne’e fahe ba nasaun haat atu hala’o sira-nia atividade, liuliu iha área múzika, promove koñesimentu no apresiasaun kona-ba patrimóniu múzika hosi nasaun partisipante sira, rejistu kampu, dijitalizasaun, promosaun no distribuisaun internasionál.

“Ba Timor-Leste, orsamentu ne’ebé estabelese ona foka liu ba rejistu kampu, ba dezenvolvimentu formasaun múzika no kompetisaun,” nia hateten.

Jornalista : Osória Marques

EDitór       : Cancio Ximenes

iklan
iklan

Leave a Reply

iklan
error: Content is protected !!