VIQUEQUE, 25 agostu 2023 (TATOLI)–Asosiasaun Futeból munisípiu Viqueque, sesta ne’e, lori jogadór selesaun sub-17 hosi munisípiu Viqueque partisipa jogu futeból Telkomcel Cup nível rejionál, iha munisípiu Baucau.
Molok jogadór arranka, Sekretáriu Administradór munisípiu Viqueque, Teotónio Sarmento da Silva, enkoraja jogadór sira hodi hatudu talentu di’ak iha jogu tanba sei reprezenta munisípiu.
“Ha’u husu ba imi hotu nu’udar jogadór tenke hatudu talentu di’ak tanba ita ba reprezenta munisípiu, nune’e bainhira ita hasoru adversáriu tenke hatudu disiplina durante jogu laran. Imi mós tenke kuidadu saúde,” Reprezentante administrasaun Viqueque hateten ba Agência Tatoli, hafoin despede jogadór iha resuntu edifísiu administrasaun munisípiu Viqueque, sesta ne’e.
Notísia relevante : AFB halo hela preparasaun ba jogu rejionál sub-17
Sekretáriu Administradór husu jogadór atu kria unidade, labele hirus malu no hakilar malu durante jogu nian laran.
“Ha’u husu ba imi tenke kria pás no unidade atu nune’e bainhira iha jogu nia laran hasoru ema bele la’o di’ak. Ha’u fiar imi sei halo jogu ho di’ak,” nia akresenta.
Iha fatin hanesan, Prezidente Asosiasaun Futeból Viqueque, Cosme Sarmento, hateten, jogadór sira halo ona preparasaun antes ne’e.
“Ami halo selesaun hodi hetan jogadór 45 partisipa Telkomcel Cup,” nia relata.
Jogu rejionál partisipa hosi jogadór Baucau, Manatuto no Viqueque, nune’e bainhira manán sei partisipa iha Telkomcel Cup nível nasionál.
“Jogu hahú sesta ne’e, ami sei akompaña lori jogadór sira. Karik sira manán sei kontinua ba nasionál,” nia tenik.
Jogadór sub-17 hamutuk na’in-30 no ofisiál na’in-lima sei desloka partisipa jogu rejionál Telkomcel Cup ne’ebé sei realiza iha kampu futeból Baucau.
Jornalista : Vitorino Lopes da Costa
Editora : Julia Chatarina
