Autoridade RAEOA rekolla rihun $20 liuhosi feira produtu lokál

OÉ-CUSSE 05 setembru 2023 (TATOLI –  Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretáriu Rejionál ba Asuntu Komérsiu no Indústria, rekolla reseita rihun $20 ba kofre Estadu liuhosi implementasaun feira produtu lokál durante loron 26.

Notísia relevante: RAEOA loke feira ho atividade sia komemora loron FALINTIL no Konsulta Populár

Sekretáriu Rejionál ba Asuntu Komérsiu no Indústria, Pedro da Silva Boquifai, informa, feira produtu lokál realiza ho objetivu ida atu promove no valoriza produtu lokál sira-ne’ebé prodús hosi komunidade hodi komemorasaun loron FALINTIL 20 agostu 1975 no loron Konsulta Populár 30 agostu 1999.

“Iha atividade feira ne’e durante loron 26 komisaun organizadora rekolla reseita hamutuk rihun 20 mak ita hatam ba kofre Estadu, liuhosi kofre rejiaun nian,” Pedro da Silva Boquifai, informa iha kalan enseramentu feira produtu lokál iha Palaban, Oé-Cusse, segunda kalan.

Nia informa, reseita ne’e rekolla liuhosi rejista karosa no rejista jogu tradisionál sira hanesan kuru-kuru, kere-kere no bola guling.

“Maibé rendimentu hosi partisipasaun ba feira ida-ne’e, hosi grupu indústria sira-nia rendimentu maka $2.576.25, ba karosa sira-nia rendimentu iha $5.650.50, ristorante sira balun hetan to’o $7.500, ba kere-kere sira kada pesoál balu hetan $3.900, jogu tradisional sira hanesan kuru-kuru no bola-guling,” nia informa.

Nia hateten, problema ne’ebé komisaun organizadora enfrenta iha durante eventu ne’e, maka planu atividade balu realiza la refleta tuir tema ne’ebé iha hanesan iha loron FALINTIL 20 agostu, nune’e komisaun organizadora adia fali ba loron konsulta populár 30 agostu.

Notísia relevante: RAEOA abertura feira sirkula ekonomia no promove produtu lokál durante loron 21

Tuir nia, bazea observasaun no verifikasaun, katak durante ne’e partisipante sira mai partisipa iha eventu feira ne’e, seidauk iha konsiénsia  ne’ebé di’ak hodi kuida no konserva lixu iha ambiente feira nian.

Konkluzaun ikus hosi atividade feira ida-ne’e durante loron 26, la’o ho susesu, tan ne’e hosi komisaun organizadora ba feira ne’e, hakarak hato’o agradese ba parte seguránsa Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) tanba asegura atividade ne’e kuaze susesu no diferenti ho tinan hirak kotuk.

Notísia relevante: PNTL la tolera kualkér individu tenta kria instabilidade iha feira Oé-Cusse

Jornalista: Abílio Elo Nini

Editór: Evaristo Soares Martins