Veteranu nia oan 151 hosi Oé-Cusse asesa bolsa estudu

OÉ-CUSSE, 06 setembru 2023 (TATOLI – Veteranu nia oan na’in-151 nu’udar estudante hosi Rejiaun Administrativa Espesiál Oé-Cusse Ambeno (RAEOA) aprovadu asesa bolsa estudu hosi Ministériu Asuntu Kombatente Libertasaun Nasionál (MAKLN) iha tinan fiskál 2023 nian.

Programa atribuisaun bolsa estudu ne’e espesiál ba oan kombatente no martir libertasaun nasionál, ne’ebe atribui hosi Ministériu Asuntu Kombatente Libertasaun Nasionál (MAKLN) liuhosi Diresaun Nasionál Pensaun no Subvensaun (DNPS) bazea ba dekretu-lei númeru 8/2009, loron 15 jeneiru, 2023.

Notisia relevante: Estudante 164 hosi Oé-Cusse sai kandidatu asesu bolsa estudu veteranu

Prezidente Konsellu Veteranu Oé-Cusse, Venancio Lafu, esplika, konsellu veteranu simu ona lista rezultadu finál hosi ministériu, kona-bá bolsa estudu ba veteranu nia oan, hosi primeiru siklu klase I to’o klase IV ensinu báziku, segundu no terseiru siklu klase V to’o IX, ensinu sekundáriu no ensinu superiór rai laran no estranjeiru.

“Primeiru siklu ensinu báziku ema na’in-hitu (7) mak aprovadu, na’in-rua (2) la liu, segundu no terseiru siklu, ema na’in-39 maka aprovadu eskluidu na’in ida (1), ensinu sekundáriu na’in-41 mak liu, eskluidu na’in-rua (2), ba ensinu superiór iha rai laran na’in-62, na’in-10 eskluidu, ensinu superior ba estranjeiru na’in-rua (2) mak liu,” Venancio Lafu ba Tatoli iha Oé-Cusse, kuarta ne’e.

Tán ne’e estudante sira-ne’ebé aprovadu hosi primeiru siklu to’o ensinu superiór hamutuk ema na’in-151 no reprovadu hamutuk ema na’in-13, tanba antes ne’e Konsellu Veteranu Oé-Cusse simu dokumentu hamutuk 164 mak kompete iha bolsa estudu ne’e.

“Razaun estudante sira-ne’ebé eskluidu ka reprovadu tanba dokumentu la kompletu no balu hosi aproveitamentu valór hosi eskola la sufisiente tanba la prienxe estandarizasaun, ne’e maka hamutuk ema na’in-13,” nia klarifika.

Notisia relevante: Governu Altera Atribuisaun Bolsa Estudu Ba Veteranu Nia Oan Sira

Prezidente Konsellu Veteranu Oé-Cusse, esplika, tuir kritériu valór hosi ministériu ba ensinu superiór kada estudante tenki iha valór másimu 3,84 no mínimu 0,86, ensinu sekundária tenki iha valór másimu 8,73 no mínimu 6,8, ba segundu no terseiru siklu tenke iha valór másimu 8,56 no mínimu 5,11, primeiru siklu valór másimu 10 no mínimu 6,11.

Nia hateten, valór orsamentu ba estudante sira iha diferensa mak aloka ba tinan ida nian ba 2023, ba ensinu superiór iha rai laran, kada estudante sei hetan rihun $1, ba rai liur rihun $2, ensinu sekundáriu kada estudante sei hetan $650.00, segundu no terseiru siklu sei hetan $600.00 no primeiru siklu sei hetan $300.00 ba tinan ida nian.

Maibé osan ne’e ministériu sei tranfere direita ba sira-nia konta bankária iha setembru to’o outubru 2023, ne’e ba ensinu sekundáriu ho ensinu superior de’it, ba ensinu báziku primeiru, segundu no terseiru siklu sei simu direita hosi inan-aman tanba seidauk loke konta bankária.

“Osan ne’e atu sustenta sira hosi uza ba nesesidade eskola nian durante tinan ida, Estadu la autoriza uza ne’e ba asuntu seluk, maibé koloka ba nesesidade estudante nian ba eskola,” nia apela.

Nia informa, ba sira-ne’ebé reprodavu sei iha oportunidade iha 2024 bele kompete tán, tanba bolsu estudu ne’e la permanente, karik sira-ne’ebé hetan ona aprovadu maibé iha 2024 valór tun bele lakon direitu ne’e.

Tanba prosesu verifikasaun bazea ba dokumentu komprovativu, katak oan tenke kombatente no tenke iha valór másimu hosi prienxe kritéria hosi ministériu nian.

“Ita haree balu oan haat tolu liu hotu, ne’e tanba prienxe kritériu sira-ne’e, ne’ebé ba oin atu kontinua hetan bolsa estudu ne’e, tenke estuda maka’as,” nia fó hanoin.

Notisia relevante: Tinan 2022: MAKLN atribui bolsa estudu ba veteranu nia oan 1.300

Jornalista   : Abílio Elo Nini
Editór           : Evaristo Soares Martins