VIQUEQUE, 12 setembru 2023 (TATOLI)-Ekipa rekrutamentu hosi Komisaun Nasionál Eleisaun (CNE,sigla portugués) munisípiu Viqueque, tersa ne’e, fó ona teste eskrita ba kandidatu 248 ne’ebé aplika ona vaga atu sai Ofisiál Supervizaun Eleisaun ne’ebé sei halo fiskalizasaun ba eleisaun aldeia no suku iha loron 28 fulan-outubru 2023.
Tuir Diretór CNE munisípiu Viqueque, Honorio da Silva Cruz, informa ekipa CNE munisípiu Viqueque fó teste eskrita ba kandidatu Ofisiál Supervizasaun Eleisaun suku hodi halo fiskalizasaun durante eleisaun suku iha munisípiu Viqueque .
“Ohin ami hahú prosesu teste ba kandidatu supervizaun eleisaun suku sira ne’ebé liu selesaun dokumentu foin lalais ne’e hamutuk na’in-256, maibe na’in-8 latuir teste eskrita hodi prepara eleisaun suku tinan ida-ne’e,” Diretór CNE munisípiu Viqueque ne’e dehan ba Agência Tatoli, iha postu Viqueque Villa, tersa ne’e.
Tuir planu hosi CNE munisípiu Viqueque nian sei rekruta Ofisiál Fiskalizasaun Eleisaun hamutuk ema-234 hodi destaka ba kada aldeia no suku ema na’in-ida.
“Kona-ba kna’ar kanditu sira-ne’e sei halo supervizaun eletorál meza asembleia, nune’e destaka sira ba kada aldeia sira-ne’e fó apoia ba prosesu eleisaun suku no partilla informasaun ba kandidatu sira, karik ita-nia kandidatu sira la-komprende bele ajuda sira,” nia hateten.
Nia dehan no rezultadu teste eskrita sei fó sai ihe tempu badak, nune’e bele haka tba faze entrevista ne’ebé sei hala’o durante loron tolu hahú loron 19 to’o 21 fulan-setembru 2023. “Depois prosesu entrevista hotu sei fó formasaun ba kandidatu sira-ne’ebé liu ne’e, no sei koloka kada aldeia iha fulan-outubru”nia hatutan.
Teste eskrita ne’e realiza iha Sentru Evakuasaun Beloi no Salaun Adiministrasaun Munisipál Viqueque, ne’ebé hetan akompañamentu hosi Inspitór jerál CNE no funsionáriu CNE Viqueque nian.
Jornalista : Vitorino Lopes da Costa
Editór : Agapito dos Santos
